Нам улууһун баһылыга Юрий Слепцов, улуус депутаттарын сэбиэтин председателэ, халаан содулуттан эмсэҕэлээһини чөлүгэр түһэрии боппуруостарын сүрүннүүр дирекция салайааччыта Алексей Винокуров, «Нам улууһа» МТ баайын-дуолун, сирин-уотун салайар комитет салайааччытын солбуйааччы Алексей Аммосов бэҕэһээ, атырдьах ыйын 22 күнүгэр, 2 Хомустаахха, Хатырыкка, Модукка, Граф Биэрэгэр сааскы халаан уутуттан дьиэлэрэ толору эмсэҕэлээбит олохтоохтору кытта көрүстүлэр. Бу туһунан «Нам улууһа» МТ пресс-сулууспата суруйда.
Юрий Иннокентьевич салайааччылаах үлэлиир бөлөх сырыытын сүрүн соруга – дьиэлэрэ толору эмсэҕэлээн федеральнай бюджеттан саҥа дьиэ атыылаһыытыгар, саҥа дьиэ тутуутугар төлөбүр ылар олохтоохтору кытта илэ көрсөн, утары олорон кэпсэтии, быһаарыы, сырдатыы, чуолкайдааһын үлэтин ыытыы. Хас ыал саҥа дьиэ туттарын, хас ыал дьиэ атыылаһарын испииһэгин өссө төгүл чуолкайдаан, хас биирдии киһини кытта кэпсэттилэр.
Улуус баһылыга Юрий Слепцов:
— Чааһынай дьиэ тутуутунан дьарыктанар урбаанньыттары ыҥыран мунньахтаатыбыт. Кэпсэтии түмүгүнэн, тутуунан дьарыктанар тэрилтэлэр саҥа толору хааччыллыылаах дьиэлэри федеральнай төлөбүр түһэн төлөнүөр диэри дуогабар быһыытынан бэйэлэрин үптэринэн-харчыларынан тутан, дьон тута киирэн олороллорун курдук күлүүһү туттарыахтарын сөп.
Маны тэҥэ, Никольскай уонна Хамаҕатта нэһилиэктэригэр дьиэ туттар ыалларга уһаайба бэриллэрин эттэ. Хатыҥ Арыы нэһилиэгин дьаһалтата «Озернай» кыбаарталга Граф Биэрэгин эмсэҕэлээбит олохтоохторугар уһаайба биэрбит. Хатырык, 2 с Хомустаах нэһилиэктэригэр дьиэ туттуон баҕалаахтарга уһаайба биэриитин боппуруоһугар үлэ барар.
Көрсүһүүгэ кэлбит дьон элбэх өйдөөбөт, мунаарар ыйытыктарын биэрдилэр. Юрий Иннокентьевич төлөбүр федеральнай бюджеттан кэлэрин санатта. Халаантан эмсэҕэлээбит нэһилиэктэр, улуус, республика салалталара ситимнээх үлэни ыыталларын эттэ.
Хаартыскалар: «Нам улууһа» МТ пресс-сулууспата