Халаан уутугар эмсэҕэлээбит дьоҥҥо харчынан көмө оҥоһуллан саҕаламмытын туһунан «Нам улууһа» МТ пресс-сулууспата иһитиннэрдэ.
Улуус баһылыгын социальнай боппуруостарга солбуйааччы Феврония Охлопкова:
— СӨ Экологияҕа, айылҕаны туһаныы уонна ойуур хаһаайыстыбатын министерствота уонна толорор дирекция иһинэн көрүллэр государствоттан көмө харчыга биһиги улууспутуттан сайабылыанньалары тутуу үлэтэ бара турар. Бэс ыйын 18 күнүгэр диэри эмсэҕэлээбит биирдиилээн дьон сайабылыанньа биэрэрэ ирдэниллэр. Бу күнү кэтэспэккэ сайабылыанньаларгытын биэриҥ. Ааспыт нэдиэлэ бүтүүтүттэн харчылар тустаахтарга түһэтэлээн эрэр.
Дьиэлэрэ-уоттара эмсэҕэлээн ыксаллаах быһыыга-майгыга түбэспит буоллахтарына, 1 киһиэхэ 10 тыһ. солк. көрүллэрэ быһаарыллан турар. Ону таһынан баайын-дуолун, дьиэ иһинээҕи малын-салын барытын сүтэрбит буоллаҕына биир киһиэхэ 100 тыһ. солк., баай-дуол аҥаара былдьаммыт буоллаҕына биир киһиэхэ 50 тыһ. солк. бэриллэр. Төлөбүр биирдиилээн киһиэхэ ананар, онон дьиэ кэргэн чилиэннэрэ бука бары сайабылыанньа суруйаллара ирдэнэр. Оҕолорго сайабылыанньаны төрөппүттэрэ суруйан биэриэхтэрин сөп.
Сайабылыанньа «Госуслуга» портал уонна МФЦ нөҥүө бэриллэр. Өскөтүн бу өҥөлөрүнэн сатаан туһаммат буоллаххытына, олохтоох дьаһалта специалистарыгар тиийэн суруйан туттарыахха сөп. Ыам ыйын 21 күнүгэр «Госуслуга» портал нөҥүө сайабылыанньа биэрбит дьоҥ көмө харчыларын ылан эрэллэр.
«Эҥсиэли» хаһыат