Хамаҕатта нэһилиэгэр, тохсунньу 19 күнүгэр «Түһүлгэ» норуот айымньытын киинигэр «Хамаҕатта нэһилиэгэ» МТ баһылыга Евгений Ушницкай сыллааҕы үлэтин отчуота ыытылынна.
Отчуот нэһилиэк «Өрөгөй ырыатын» толоруутунан саҕаланна. Отчуот кыттыылаахтарыгар «Хамаҕатта нэһилиэгин олохтоох дьаһалтатын 2023 сыллааҕы үлэтин түмүктэрэ» буклет түҥэтилиннэ. Баһылык ыытыллыбыт үлэлэри, былырыыҥҥы отчуокка киирбит туруорсуулары туолууларын отчуоттаата. 2024 сыл Хамаҕаттаҕа «Доруобуйа сылынан» биллэрилиннэ.
Общественнай түмсүүлэр үлэлэрин салайааччы Саргылана Зоирова сырдатта. Тэрээһиннэргэ наар кыттар дьон кыттарын бэлиэтээтэ. Салгыы ыйытыылар бэрилиннилэр. Кэпсэтиигэ 12 киһи кыттыыны ыллылар.
Нэһилиэнньэни ордук тыа хаһаайыстыбатын көрдөрүүтэ түһүүтэ, арыыга элбэх сир оттоммокко хааларын, алаастарга да, арыыларга да аартыктары оҥоруу, нэһилиэккэ баанньык үлэтин сөргүтүүнү, уулуссалары оҥоруу уонна сырдатыы, бэйдиэ сылдьар ыттары бэрээдэктээһин курдук сытыы боппуруостар тула кэпсэтии буолла. Баһылык 2023 с. отчуота биһирэннэ.
Маргарита Охлопкова