Е.М. Шапошников аатынан Хамаҕатта оскуолата аһыллыбыта 90 сылынан киэҥ программалаах тэрээһин күнү быһа ньиргиччи барда. Сарсыарда 10 чаастан бастакы оскуола буолбут Ион Николаевич Атласов дьиэтигэр мемориальнай дуоска үөрүүлээх аһыллыыта сиэн кыргыттара Полина Федорова, Людмила Григорьева кыттыылаах буолла.
Ол кэнниттэн Ефим Михайлович Шапошниковка аналлаах стендэ аһыллыыта ыытылынна. Манна Ефим Михайлович кыргыттара Екатерина Ефимовна уонна Туйаара Ефимовна Шапошниковалар кыттыыны ылбыттара суолтатын дириҥэттэ.
Биир кэрэхсэбиллээх түгэнинэн оскуола историятын кэпсиир музей-хос аанын арыйан үгүс ыалдьыттары көрүстэ. Маны сэргэ, оскуола оҕолоро кылаас чаастарыгар ыҥырыылаах ыалдьыттары, ветеран учууталлары көрүстүлэр, күнү быһа экскурсиялары тэрийдилэр, фотозоналарга үбүлүөйдээх күнү үйэтитэн хаартыскаҕа түстүлэр, выпускниктар галереяларын, быыстапкаларын көрдүлэр. Үбүлүөй үөрүүлээх чааһыгар оскуола учууталларын, үлэһиттэрин ситиһиилээх үлэлэрин иһин чиэстээһин эҕэрдэ нүөмэрдэринэн доҕуһуолланан барда.
Оскуола выпускниктара оҥостон, симэнэн кэлэн үөрэммит оскуолаларыгар махтанан эҕэрдэлэрин анаатылар, бэлэхтэрин туттардылар. Ити курдук, оҕо саастарыгар эргиллэн, көлүөнэлэр түмсэн, кынаттаабыт кыһаларын 90 сыллаах өрөгөйдөөх үбүлүөйүн ахсынньы 1 күнүгэр долгуйа, үөрэ-көтө атаардылар.
Мария Винокурова
Редакцияттан: Нам улууһун Хамаҕатта нэһилиэгэр, РФ Президенэ Владимир Путин көҕүлүүр «Үөрэхтээһин» национальнай бырайыак чэрчитинэн, былырыын Билии күнүгэр 220 үөрэнээччигэ анаммыт, 50 миэстэлээх интернаттаах саҥа таас оскуола үлэҕэ киирбитэ. Онон хамаҕатталар оскуолаларын 90 сыллаах үбүлүөйүн киэҥ-куоҥ, сырдык-сылаас, аныгылыы моһуоннаах дьиэҕэ көрсөн, үөрүүлэрэ үгүс.