Бүгүн Нам улууһун В.П. Артамонов аатынан Хамаҕатта саха-француз лицейигэр саха атынан Өймөкөөнтөн дойду тэбэр сүрэҕэр Москуба куоракка диэри саха атынан айаннаабыт, саханы саха дэппит эдэр сылгыһыт Дугуйдаан Винокуров ыалдьыттаата. Лицей үөрэнээччилэрэ Нуучча географическай обществотын кытта сибээстээх буоланнар «Интэриэһинэй дьону кытта көрсүһүү» бырайыак иһинэн бу тэрээһини ыыттылар.
Көрсүһүү сахалыы сиэринэн саҕаланна, салгыы сахалыы төрүт дьарыктарын, сылгы кылыттан-сиэлиттэн оҥоһуктарын «Сөрүө» түмсүү салайааччыта Мария Аманатова билиһиннэрдэ. Бу кэннэ Дугуйдаан лицей улахан кылааһын оҕолорун, учууталлары кытта көрүстэ. Саха АССР 100 сыллаах үбүлүөйүн көрсө уһун унньуктаах, интэриэһинэй айанын уонна саха ата тулуурун, кыаҕын туһунан кэпсээн сырдатта. Кинини кытта Санкт-Петербург куорат постпредствотыгар үлэлиир Евгений Петров сырытта. Кини саха-канадскай оскуолаҕа үөрэнэр кэмигэр «Лингва» лааҕырга сылдьыбытын уонна нуучча-географическай общество иһинэн Дугуйдаан айаныгар көмөлөспүтүн улаханнык астынан туран кэпсээтэ уонна оҕолору дириҥ билиилээх буолалларыгар, ол инниттэн литератураны хото ааҕалларыгар сүбэлээтэ.
Үөрэнээччилэр, төрөппүттэр, учууталлар Дугуйдаан Винокуров дьыл араас кэмигэр Россия 17 регионун нөҥүөлээбит мүччүргэннээх айанын туһунан сөҕө-махтайа иһиттилэр, элбэх ыйытыылары биэрдилэр.
Түмүккэ лицей дириэктэрэ Юрчана Парникова саха атын аар-саарга аатырдыбыт үрдүк аналлаах Дугуйдаан Винокуровка, нуучча-географическай обществоны кытта сибээһи чиҥэппит Евгений Петровка махталын биллэрдэ. Көрсүһүү ис хоһоонун лицей 6 кылааһын үөрэнээччитэ Давид Прокопьев айанньыт, атыыһыт, меценат Николай Осипович Кривошапкин үтүөлэрин сырдатан, нэһилиэк аҕаларын «Эркин» түмсүүтүн салайааччыта Владимир Уодай уол оҕону иитиигэ санааларын этэн ситэрэн биэрдилэр.
Көрсүһүү кыттыылаахтара Дугуйдааҥҥа модун санааны, саха атынан салгыы айанныыр бырайыага өссө киэҥ далааһыннаах, таһаарыылаах буоларыгар баҕара хааллылар. Оттон оҕолор Дугуйдаан холобуруттан саха эр киһитэ биир тыллаах, күүстээх санаалаах, быһаарыныылаах буолуохтааҕын өйдөөбүттэригэр эрэнэбит.
Мария Винокурова