Бэс ыйын 3 күнүттэн Владислав Тимофеев салайааччылаах сервиснэй этэрээт үлэтин кэмэ саҕаланна. Этэрээт оҕолоро нэһилиэк палисадниктарыгар сибэкки олордон бүтэрдилэр.
Валентин Абрамов салайааччылаах МАУ АРТ элбэх өрөмүөн үлэтин ыытан, сайыҥҥы
уу ситимин бэс ыйын 6 күнүттэн холбоото.
Бу күннэргэ олохтоох музей тэриллиитигэр эппиэттээх үлэһит, общественник Сандаара Оротоо биирдиилээн ыалларынан кэрийэн экспонат хомуйуутугар күүскэ үлэлэһэ сылдьар. Жиркова Елена Николаевнаттан, Попова Мотрена Васильевнаттан, Жиркова Мотрена Алексеевнаттан, Дьячковская Вера Семеновнаттан, Климовская Анастасия Степановнаттан, Семенов Валерий Николаевичтан балачча элбэх ааспыт кэм малларын-салларын хомуйан фондатын хаҥатта.
Тыа хаһаайыстыбатын специалиһа Маргарита Габышева тэрийиитинэн, халаан уутугар алдьаммыт нэһилиэк бүтэйин өрөмүөннүүргэ ыҥырыыны ылынан Егор Афанасьев, Григорий Зырянов, Гаврил Новгородов, Константин Семенов үлэлээбиттэр.
Ый 7 күнүгэр Москваҕа Кыһыл болуоссакка ыытыллыбыт кинигэ фестивалыгар ,,Якутские художники детям» комплект кинигэ Лауреат аатын ылбыт. Оҕолорго аналлаах методическай кинигэни ,,Тускул» уһуйаан педагогтара А.П. Местникова, Г.Д. Готовцева, Л.Д. Колесова, В.Д. Васильева хомуйан оҥорбуттар. Проект автора О.И. Михалева салайыытынан ,,Айар» кинигэ кыһатыгар ,,Сохранение и развитие государственных и официальных языков РС(Я)» программа иһинэн тахсыбыт.
Субуота күн библиотекарь Марина Корякина ааҕааччыларыгар ,,Кыыс кэтэһэр ыһыаҕы» темаҕа маастар-кылаас тэрийдэ. Онно ийэлэр, кыргыттарын симииллэригэр суһуох киэргэлин оҥорорго Анна Шадринаттан үөрэннилэр.
Салгыы Е.М. Шапошников аатынан орто оскуола лааҕырын оҕолоругар Пушкин күнүн ыытта. Кыра саастаах ааҕааччылар Пушкин остуоруйаларыгар ыалдьыттаатылар, быыстапканы билистилэр, конструкторунан оонньоотулар.
,,Спортивные Якутяне» спартакиадаҕа гиирэ спордугар тренер Иннокентий Окоемов иитиллээччилэрэ үрдүк ситиһиилэннилэр, хамаанданан бастаатылар:
Уолаттарга:
63 кг, Харатаала Арчылан, 3-с м., ХСФЛ, 9кл.
68 кг, Харатаала Арылхан Арыйаан Уола, 3-с м., ХСФЛ, 10кл.,
73 кг, Алексеев Артём Олегович, l Хомустаах оскуолата, 5-с м., 10 кл.,
78 кг, Нератов Сайтама Иннокентьевич, 1-кы м., Намнааҕы техникум
85 кг, Николаев Виктор Степанович, 2-с м., ХСФЛ, 11кл.,
85 кг үөһэ. Саввинов Дамир Александрович, 4-с м., ХСОШ, 10кл.
Кыргыттарга
63 кг, Иванова Тая, ХСОШ, 8 кл., 4-с м.,
68 кг, Лукина Кристина Денисовна, 4-с м., ХСОШ, 11кл.
,,Туймаада»’ государственнай ансаамбыл республикатааҕы ансаамбылынан толоруу ,,Мелодии белых ночей» ырыа куонкуруһугар ,,Кытыл кыыма» вокальнай ансаамбыл(муз.сал. Сардаана Захарова) 3-с истиэпэннээх Лауреат аатын ылла.
Хамаҕаттаҕа күнтэн күн сонун сонун үксүүр, ыһыахха бэлэмнэнии тэтимирэр.
Мария Винокурова