Саха Өрөспүүбүлүкэтигэр Оҕо сылынан уонна Нам улууһугар Оҕо спордун сылынан оҕолорго үгэскэ кубулуйбут футбол күрэҕэ ыытылынна. Түөлбэлэртэн «Кытыл», «Сайдам», «Арыы-Тиит» хамаандалара кытыннылар.
Күрэх аһыллыытыгар спортсмен оҕолор мэтээллэрин кэтэн кэккэлээн киирдилэр. Спортсменнарга баһылык солбуйааччыта Владилен Москвитин, күрэх тэрийээччитэ, «Сайдам» түөлбэ салайааччыта Люция Ушницкая эҕэрдэ тыллары эттилэр. Киирсиилээх күрэх түмүгүнэн «Кытыл» хамаанда — 1 миэстэ, «Сайдам» — 2 миэстэ, «Арыы-Тиит» — 3 миэстэ буоллулар. «Бастыҥ вратарь» — Жирков Кирилл, «Бастыҥ кимээччи» — Барашков Эрчим, «Бастыҥ оонньооччу» — Жирков Ильдар, «Бастыҥ көмүскээччи» — Атласов Артур анал ааттары ыллылар.
Тэрийээччи, «Сайдам» түөлбэ салайааччыта:
— Оҕолорго футболга күрэхтэһиини 2017 сылтан тэрийэн ыытабыт. Кыһыҥҥы өттүгэр Н.П. Габышев аатынан «Эрчим» СК оҕолору тренер Вадим Соловьев дьарыктыыр. Судьуйаларбытыгар Рустам Зоировка, Максим Поповка, спонсордарбытыгар нэһилиэкпит наставниктарын сүбэтигэр (сал. Заровняева А.З.) түөлбэ салайааччыларыгар Саргылана Зоироваҕа, Марфа Харитоноваҕа, Люция Ушницкаяҕа, СК «Эрчим» салайааччытыгар Андриан Протодьяконовка махталбытын тиэрдэбит. Эдэр футболистар сылтан сыл оонньууллара тупсан, техникалара сайдан иһэрэ ыалдьааччылары, төрөппүттэри үөртэ. Оҕолорбут футбол көрүҥэр ситиһиилэрэ үрдүү турдун!
Марфа Харитонова «Кытыл» түөлбэ салаҋааччыта:
— Наһаа үчүгэй күрэхтэһии буолан ааста, оҕолорго бириистэрин элбэх гыныахха наада, санааларын өрө көтөҕөн. «Кытыл» түөлбэбит оҕолоро кыайыылаах буоллулар. Хамаандаҕа Барашков Эрчим, Жирков Ильдар, Неустроев Сарыал, Сивцев Антон, Семенов Бэргэн, Семенов Эрчим табыллан оонньоотулар. Уолаттар сайыны быһа бэйэлэрэ оонньууллар, дьарыктаналлара туһалаата. Түөлбэҕэ футбольнай поле баара буоллар оҕолор, эдэр ыччат да дьарыктаныа этилэр. Тэрийээччилэргэ, төрөппүттэргэ махтал!
Мария Винокурова