Ахсынньы 1 күнүгэр, Е.М. Шапошников аатынан Хамаҕатта орто оскуолатын 90 сааһын бэлиэтиир дьоро күҥҥэ, оскуола түмэлэ сөргүтүллэн, үөрүүлээх быһыыга аһылынна.
Быйылгы үөрэх сылыттан улуус бары оскуолаларыгар түмэллэр, түмэл муннуктара тэрилиннилэр. Дойду үрдүнэн улахан хамсааһын барда. Биһиги түмэлбитин тэрийэрбитигэр көмөлөспүт үлэлээн ааспыт аҕа коллегаларбытыгар Тамара Ивановна Бурнашеваҕа, Вера Алексеевна Чириковаҕа муҥура суох махталбытын аныыбыт. Кинилэр муспут, суруйан, оҥорон хаалларбыт материалларынан түмэл баай уонна толору. Оскуола историятын, график-художник Ефим Шапошников олоҕун, айар үлэтин, буойун учууталлары уонна үлэһиттэри, Хамаҕаттаҕа эрэ тэриллибит «Төлөннөөх сүрэхтэр» пионерскай этэрээт историятын, оскуолатааҕы лесничество туһунан экспозициялар кэпсииллэр. Туспа экспозиция түмэли төрүттээччилэрбитигэр ананна. Вера Алексеевна да, Тамара Ивановна да бастакы тэрийээччинэн буойун-учуутал Николай Гаврильевич Новгородовы ааттыыллар. Александр Григорьевич Дунаев оҕолор үлэлэрин мунньан түмэл оҥоро сылдьыбыт. «Оскуолабытыгар өр сыл үлэлээбит учууталлар уонна үлэһиттэр» экспозицияны толорон биэриэхпит.
Күһүн нэһилиэнньэҕэ «Оскуола түмэлигэр бэлэх» диэн акция биллэрэрбит туһунан ыҥырыы сурук тарҕаппыппыт. Выпускниктарбыт, ветеран учууталларбыт хардаран, үөрэххэ сыһыаннаах тээбириннэри бэлэхтээн үөрүүбүт үгүс, махталбыт муҥура суох. Ону сэргэ, үбүлүөйдээх выпустар кинигэ эбэтэр альбом оҥорон бэлэхтииллэрэ үтүө үгэс буолла. Барыгытын, күндү ыалдьыт буолан, түмэлбитигэр уруккуну ахтан-санаан ааһаргытыгар ыҥырабыт.
Яна Петрова