Хатыҥ Арыы нэһилиэгин олохтоох дьаһалтатыгар бэҕэһээ, сэтинньи 16 күнүгэр, спорт уонна ыччат отделын көҕүлээһининэн, дириэктэр Егор Бурнашев сүбэ мунньаҕы тэрийэн, баһылык Иван Ноговицын сүрүннээн ыытта.
Мунньахха спорт ветераннара, спорт маастардара, общественность кыттыыны ыллылар. Мунньах түмүгүнэн нэһилиэккэ 16 спорт көрүҥэр федерация тэрилиннэ. Онно эппиэтинэстээх спорт отделын үлэһиттэриттэн туһааннаах ветераннар, маастардар ананнылар. Кэлэр сылга мөлтөх көрдөрүүлээх спорт көрүҥнэригэр улахан болҕомто ууруллан үлэ барыаҕа.
2024 сылы Арассыыйа президенэ Владимир Путин Спорт сылынан биллэрбитин этэн туран, Хатыҥ Арыы нэһилиэгэр 2024 сылы «Спорт уонна Чөл олох» сылынан биллэрии туһунан этии киирдэ.
Маны тэҥэ, 2024 сылга тэрилтэлэр икки ардыларыгар олунньуттан саҕалаан ахсынньыга диэри 8 спорт көрүҥэр Спартакиада ыытылларын туһунан былааҥҥа киирдэ.
Нэһилиэк олохтоохторун көрдөһүүтүнэн, Аппааны бөһүөлэгин общественность балаҕаныгар бильярд остуола туруоҕа, Кыһыл Дэриэбинэҕа баар МФЦ-га нэһилиэк олохтоохторугар уонна оҕолорго анаан волейбол секциятын арыйыы туһунан иһитиннэрдилэр.
Надежда Сивцева