Граф Биэрэгэр «Самородок» култуура дьиэтигэр тохсунньу 27 күнүгэр күнүс 2 чаастан Нам улууһун 2024 сылга ыыппыт үлэтин отчуота Юрий Слепцов салайааччылаах бастакы бөлөҕө сырытта. Отчуокка уопсайа 57 олохтоох кытынна. Отчуоту баһылык Иван Ноговицын салайан ыытта. 2024 сыллаахха Нам улууһун дьаһалтатын 40 мүнүүтэлээх видеоотчуотун көрөн баран 2023 сыллаахха олохтоохтортон киирбит боппуруостарга уонна этиилэргэ хоруйдары биэрдилэр.
Ааспыт сылга Граф Биэрэгин олохтоохторугар улахан урусхаллаах халаан уута кэлэн, үгүс улахан хабааннаах үлэ ыытылынна. Халаан уутугар эҥкилэ суох үлэлэспит дьоммутугар Нам улууһун “За вклад в предупреждении и ликвидации чрезвычайных ситуаций” бочуот бэлиэлэрэ Мордосов Максим Васильевичка, Семенова Саргылана Егоровнаҕа туттарылынна. Нам улууһун “За вклад в ликвидации чрезвычайных ситуаций” махтал суругунан уонна значогунан Анна, Петр Охлопковтар, Елизавета Захарова, Мичил Герасимов, Леонид Соловьев, Ньургустан Жирков, Егор Сивцев, Валерий Акимбетов, Тимофей Сметанин наҕараадаланнылар. Россияҕа Дьиэ кэргэн сылынан, олоххо көхтөөх гражданскай позициялаах, уопсастыбаннай олоххо көхтөөх дьиэ кэргэттэргэ Людмила, Николай Петровтарга Юрий Слепцов бочуоттаах грамотатын, Саргылана, Тимофей Сметаниннарга махтал суругун туттардылар. Толору саалаҕа мустан олорор уопсайа 17 олохтоохтон 37 ыйытыы киирдэ.
Сүрүннээн Граф Биэрэгэр саҥа оскуола тутуутун, халаан уутун сэрэтэр сыаллаах дрон аппаратын атыылаһыытын, саҥа ФАП тутуута, саҥа култуура дьиэтин тутуутун, хаарбах дьиэттэн көһүү программатын, Советская уулуссаҕа саҥа опора ЛЭП холбонуутун, “Ромашка” оҕо саадыгар кухня-прачка тутуутун, Кыайыы 80 сылын көрсө пааматынньык өрөмүөнүн, Затон ситэтэ суох орто оскуолатын акылаата уларыйыытын уонна эбии өрөмүөннэнэригэр көмө наадатын, спортивнай саала тутуутун, эдэр специалистарга анаан дьиэ тутуутун, шлюз тутуутун, саҥа техникум тутуутун, онно улуустан, нэһилиэк дьаһалталарыттан комиссия хонтуруолугар ылааһынын, бэйдиэ сылдьар ыттары кытта үлэ о.д.а. боппуруостар киирдилэр. Олохтоохтор бары биир санаанан улуус дьаһалтата ыыппыт үлэтин биһирээтилэр, Юрий Слепцов хамаандатыгар, олохтоох дьаһалтаҕа халаан уутун содулун туоратыыга ыыппыт үлэлэрин иһин махталларын тиэртилэр.
Аппааны “Чороон” норуот айымньытын киинигэр киэһээ 5 чаастан отчуокка уопсайа 75 киһи кытынна. Манна Нам улууһун баһылыгын бастакы солбуйааччыта Павлов Анатолий Иванович 14 киһилээх иккис бөлөҕө сырытта. 40 мүнүүтэлээх отчуоттуур видеоролик көрдөрдүлэр. Салгыы халаан уутун туоратыыга үлэлэспит нэһилиэк олохтоохторугар Нам улууһун “За вклад в предупреждении и ликвидации чрезвычайных ситуаций” бочуот бэлиэлэрин Жирков Евгений Геннадьевичка, Маркова Ингеборга Николаевнаҕа, Никитина Анастасия Николаевнаҕа туттарылынна. Нам улууһун “За вклад в ликвидации чрезвычайных ситуаций” махтал суругунан уонна значогунан Герман Марков, Надежда Сивцева, Екатерина Стрекаловская, Татьяна Замятина, Петр Ильин, Яков Машников, Дмитрий Лыткин, Кирилл Алексеев, Егор Марков, Артур Винокуров, Сергей Парников, Елена Оконешникова, Миролюбовь Сивцева, Луиза Эверстова, Касьян Сивцев туттулар. Онтон махтал суруктарынан Владимир Оконешников, Алексей Евсеев, Владислав Соловьев, Тимур Марков, Виталий Марков, Мария Сивцева, Леонид Чупров, Гаврил Макаров, Никита Килбясов, Эдуард Марков, Егор Бурнашев, Аммачыак Толлуман Махсыым Уола туттулар. Дьиэ кэргэн сылын түмүктээн бастыҥ ыалларга Марианна, Егор Эверстовтарга, Наталья, Михаил Сивцевтэргэ Юрий Слепцов бочуоттаах грамотатын, Анна, Михаил Нестеровтар, Оксана, Владимир Власовтар, Нария, Сергей Семеновтар, Алла, Аркадий Соловьевтар махтал суругу туттулар.
Салгыы ааспыт 2023 сылга ыйытыыларга, этиилэргэ тохтоон аастылар. Отчуокка 9 нэһилиэк олохтооҕо боппуруос биэрдэ. Ол, курдук Хатыҥ Арыы орто оскуолатын мастерскойун тутуу, арыыга оттооччуларга СПЖ сүүрбэтэ ыарахаттары үөскэтэрин, Намҥа оҕо сынньанар, сыыртан сырылыыр анал былассааккалар наадаларын, “Озернай” кварталга оҕо былассаакката, интернет ситимэ наадатын, тыа хаһаайыстыбатыгар оҥорон таһаарбыт бородууксуйаны атылыырга субсидия көрүллүүтүн, хаарбах дьиэттэн көһүү программатын үлэтин, И.Е. Винокуров төрөөбүтэ 130 сылын көрсө Аппааны-Кыһыл-Дэриэбинэ федеральнай суолун оҥоруута, арыы сирин өртөөһүнүн көҥүллээһин, кэтэх тэрээһиннээх хаһаайыстыбаларга үөрэхтээх зоотехник исписэлииһэ наадатын, осеменение, “Кулун өлбүт” баазатыгар газ ситимин тардыытын, мелеоризация үлэтин күүскэ ыытыы, Намҥа баар фекалка миэстэтин уларытыы, Модут агрооскуолатын кытта бииргэ ситимнээх үлэ барыытын, 50 лет Победы уулуссаҕа уот ситимэ мөлтөҕүн, уулуссаларга, чааһынай олбуордарга турар урукку туттуллубат уот, телефон остуолбаларын хомуйуу, нэһилиэккэ эдэр исписэлиистэргэ дьиэ тутуута, Хатыҥ-Арыы орто оскуолатын баазатын иһинэн тустуу саалатын тутуу, о.д.а. боппуруостар киирдилэр. Олохтоохтор бары биир санаанан улуус 2024 сыллаах Нам улууһун дьаһалтатын үлэтин биһирээтилэр, үүммүт сылга ситиһиини баҕардылар.
Надежда Сивцева