Ахсынньы 17 күнүгэр Аллараа Бэстээх Спорт дыбарыаһыгар «Кыталык-2023. Республиканский фестиваль исполнителей отечественных бальных танцев» диэн пааранан үҥкүүгэ күрэхтэһии буолан ааста. Анжелика Ноговицына салайааччылаах “Сыдьаайа” пааранан үҥкүүтүн бөлөҕө ситиһиилээхтик кыттан кэллилэр. Манна Горнайтан, Амматтан, Бүлүүттэн, Мэҥэ Хаҥаластан, Тааттаттан, Намтан уонна Дьокуускай куораттан күүстээх хамаандалар күөн көрүстүлэр.
Түмүккэ бэйэлэрин бөлөхтөрүгэр: Дария Мальцева-Гаврил Макаров, Мария Бугаева-Дмитрий Ноговицын, Мария Бугаева-Василий Алексеев 1 миэстэни, Полина Куличкина-Николай Петров 2 миэстэни, Людмила Петрова-Николай Петров, Мария Кривошапкина-Василий Алексеев республика алта күүстээх үҥкүүһүттэрин иһигэр киирэн, бары кыайыы өрөгөйүн билэн кэллилэр.
***
Ахсынньы 16-17 күннэригэр Модут нэһилиэгэр ыытыллыбыт спорт ветерана Иннокентий Гоголев кэриэһигэр улуустааҕы дуобат күрэҕэр Хатыҥ Арыы нэһилиэгин Иван Эверстов хапытааннаах хамаандата: Эмма Софронова, Анисия Эверстова, Валера Эверстов, Анатолий Матвеев 1 миэстэни ылары ситистилэр.
***
Ахсынньы 16 күнүгэр Нам сэлиэнньэтигэр хаалыктаах хаамыы федерацията 2023 сылы түмүктүүр тэрээһинин председатель Дмитрий Елисеев тэрийэн ыытта. Хатыҥ Арыы нэһилиэгиттэн «Тэтим» хаалыктаах хаамыы бөлөх Оксана Лебедева салайааччылаах кэлэн көхтөөх кыттыыны ылла. Көрсүһүү иһинэн ыытыллыбыт «Хааллыктаах хаамыы Далбар Хотуна» күрэххэ Марфа Павлова уонна Тамара Колесова кыттыннылар, түмүккэ Марфа Павлова үһүс бочуоттаах миэстэни ылла.
***
Хатыҥ Арыы нэһилиэгэр саастарын ситэ илик оҕолору кытта үлэлэһэр общественнай комиссия көҕүлээһининэн, ахсынньы 19 күнүгэр диэри «Мода на ЗОЖ» диэн ааттаах оскуола оҕолоругар анаан өйтөн суруйуу күрэҕэ ыытылла турар. Түмүк ахсынньы 22 күнүгэр тахсыаҕа.
***
Ахсынньы 16-17 кк. Нам сэлиэнньэтин Н.С. Тимофеев аатынан спортивнай комплекска Федерация кубогар хапсаҕайга ыытыллыбыт күрэххэ Мичил Герасимов хамандыырдаах «Хотой» ДНД хамаанда икки күн устата дьуһуурустубаҕа турда.
***
Ахсынньы 13 күнүгэр Намнааҕы Култуура уонна духуобунай сайдыы дыбарыаһыгар 2023 сыл түмүгүнэн Нам улууһун муниципальнай бириэмийэлэрин туттарыы үөрүүлээх тэрээһинэ буолла. Манна Хатыҥ Арыы нэһилиэк бэтэрээннэрин уонна пенсионердарын сэбиэтин председателэ Лебедева Оксана Ивановна Нам улууһа, Хатыҥ Арыы нэһилиэк «Ытык киһитэ» Рожина Евдокия Петровна аатынан саҥа муниципальнай бириэмийэ бастакы лауреата буолла.
Надежда Сивцева