Тохсунньу 24 күнүгэр Хатыҥ Арыы нэһилиэгэр “Нам улууһа” МТ 2023 сыллаах үлэтин отчуота буолан ааста. Аппааны бөһүөлэгэр «Чороон» норуот айымньытын киинигэр Нам улууһун баһылыгын социальнай боппуруостарга солбуйааччы Дьяконов Юрий Вячеславович салайааччылаах иккис бөлөх отчуоттаата.
Отчуоту нэһилиэк баһылыга Иван Ноговицын салайда. Маҥнай Юрий Дьяконов ааспыт сыллааҕы этиилэргэ туох үлэ барбытын сиһилии билиһиннэрдэ. Олохтоохтор сыллааҕы отчуоту видеонан көрөн бараннар ыйытыыларга киирдилэр. Ол курдук, И.Е. Винокуров аатынан Хатыҥ Арыы орто оскуолатын дириэктэрэ Павел Оконешников: 2025 сылга оскуола 85 сылын туоларынан, И.Е. Винокуров 2026 с. 130 сылын туоларынан үлэ хамыыһыйата тэриллэрин; интернат капитальнай өрөмүөнэ; үөрэнээччи элбээбитинэн оскуолаҕа эбии салҕааһын (пристрой) тутуутун; балаҕан ыйын 1 күнүттэн оскуола дьүһүннүүр искусство экспериментальнай былаһаакка буоларынан, оскуола таһыгар баар бас билиитэ суох (бесхозный) арочнай объегы ылыыга улуус өттүттэн көмө наадатын; кэлэр үөрэх дьылыттан үлэнэн иитии киирэринэн, сылаас теплица тутуутун; улуустааҕы «Воин» лааҕыр сайынын тахсан баазаланар сиригэр-уотугар эбии уот ситимэ тардылларын; эдэр учууталларга үлэ миэстэтэ уонна олорор дьиэ кыһалҕата турарын эттэ.
Улуус өттүттэн 6 квартиралаах дьиэ бырайыагар көмө наадатын Иван Ноговицын чопчулаата. Салгыы олохтоохтортон Аммосов аатынан уулусса 7 нүөмэрдээх икки этээстээх дьиэтэ тымныытын; благоустройствота тоҥорун; «Чэчир» кварталга үлэ хаһан барарын; «Озернай» кварталга кыһыҥҥы водопровод наадатын; фекалка кыһалҕата; Аппааныга И.Е. Винокуров уулусса киин хочуолга холбонуон сөбүн; култуура эйгэтигэр кыайылаахтарга харчынан бириэмийэ биэриитин; Нам-Булуус суол өрүмүөнүн; олохтоох көҕүлээһиннэри өйүүр программанан нэһилиэккэ үс бөһүөлэк киирэринэн сибээстээн, улууска сыл көтө-көтө программаҕа киллэрэллэригэр этии киирдэ.
Ил Түмэн депутата Атласов Александр Павлович үбүлүөйдээх тэрээһиннэри былааҥҥа киллэриини; эдэр специалистары дьиэлииргэ социальнай найм боппуруоһун үөрэтиитин; бас билиитэ суох «Туймаада» ФАПК объегын салгыы үөрэтии; онтон да атын боппуруостары таарыйан сиһилии сырдатта.
Күнүс 2 чаастан Кыһыл Дэриэбинэ олохтоохторун иннигэр Сергучев Петр Петрович салайар үһүс бөлөҕө кэлэн кыттыыны ылла. Олохтоохтортон окулист суоҕа эрэйдиирин; оттуур ходуһаҕа киирэргэ саҥа муоста тутуутугар улуустан көмө; Нам сэлиэнньэтигэр оҕо былаһааккалара аҕыйаҕын; саҥа музыкальнай оскуола тутуутун; «Мичээр» оҕо уһуйааныгар эбии штат көрүллүүтүн; хаарбах дьиэттэн көһөрүү программатыгар ханнык дьиэлэр киирбиттэрин туһунан уо.д.а. ыйытыктар киирдилэр.
Күнүс 3 чаастан Граф Биэрэгин «Самородок» СК улуус баһылыгын социальнай боппуруостарга солбуйааччы Юрий Дьяконов иккис бөлөҕө олохтоохтор иннилэригэр отчуоттаата. Ааспыт сылга киирбит этиилэр туолууларын истэн баран, ыйытыылар, этиилэр киирдилэр. «Ромашка» оҕо уһуйаана быйыл федеральнай үөрэх программатынан аграрнай проект суруйбутунан улуустан көмө боппуруоһа; Затоннааҕы ситэтэ суох орто оскуолаҕа 10-11 кылаастары арыйыы; Гагарин аатынан 1 кв. 4 хаарбах дьиэттэн көһүүгэ докумуон өттүгэр кэккэ боппуруостары көрсөллөрүн, онно юрист көмөтө наадата этиллэр. Нэһилиэккэ өрүс бириистэнин; грузовой терминал боппуруоһун үөрэтии; Аппааны-Озернай-Граф Биэрэгэ маршрутунан автобус сырыыта; И.Е. Винокуров аатынан кыраайы үөрэтэр музейга «Музей под открытым небом» арыйыытыгар көмө; Лена өрүскэ дириҥэтэр хаһыы үлэтэ; «Алмазная осень» квартал Кутаннахскай уулуссаҕа гаас ситимэ, уот киириитэ; «Чэчир» кварталга газ киириитэ; улууска сылы быһа үлэлиир лааҕыры арыйыы, Граф Биэрэгинээҕи 400 миэстэлээх үөрэх комплекса тутуллар миэстэтин быһаарыы; ТКО бөх быраҕар дьааһыктара алдьанан өрөмүөнүн боппуруоһа.
Отчуокка инникитин Намнааҕы техникум үлэтэ ахтыллыытын туһунан, НЦРБ специалистара уонна социальнай харалта нэһилиэккэ тахсан көрүүтэ, көмө оҥорууларын, кардиолог, окулист, стоматолог, лор быраастар тиийбэттэрэ дьоҥҥо ыарахаттары үөскэтэрин о.д.а боппуруостар киирдилэр.
Түмүккэ олохтоохтор бары улуус дьаһалтатын отчуотун биһирээтилэр.
Надежда Сивцева