2024 сыл Хатыҥ Арыы нэһилиэгэр Доруобуйа уонна физическай култуура сылын чэрчитинэн, муус устар 18 күнүгэр, олохтоох библиотекаҕа Матвей Лыткин салайааччылаах «Чөл олох эстафетата» делегацията ыалдьыттаатылар.
Матвей Иванович Дьокуускай уопсастыбаннай палататын, «Трезвая Якутия» уопсастыбаннай хамсааһын бэрэссэдээтэлэ, «Стимул» өрөспүүбүлүкэтээҕи скандинавскай хаамыы салайааччыта буолар. Тэрээһиҥҥэ «Забота Арчы» кылаабынай редактора Виктор Эверстов, хаһыат аҕа корреспондена Василий Никифоров, корреспондент Айтал Павлов кыттыыны ыллылар.
Көрсүһүүгэ «Хатыҥ Арыы нэһилиэгэ» МТ депутаттарын сэбиэтин бэрэcсэдээтэлэ Евгений Жирков, нэһилиэк «Тэтим» хаалыктаах хаамыы түмсүүтэ (сал. Оксана Лебедева) уонна олохтоохтор кэлэн көхтөөхтүк кытыннылар. Виктор Эверстов «Забота Арчы» хаһыат сыһыарыыларын, үлэтин туһунан сырдатта. Василий Михайлович тыа хаһаайыстыбатын хайысхатын хаһыакка, «Улус Mедиа» сайтыгар сырдатарын туһунан кэпсээтэ.
Матвей Лыткин билиҥҥи ыччат итирдэр утаҕы, энергетик иһэллэрэ, электроннай табаҕы тардаллара элбээбитин этэн туран, бары бүттүүн чөл олоҕу пропагандалаан ыччакка өйдөтүү үлэтин ыытары, арыгыны утары күүстээх үлэ барыах тустааҕын иһитиннэрдэ.
Салҕыы «Забота Арчы» хаһыат чэпчэтиилээх сурутуутугар сыл иккис анарыгар 11 киһи суруттарда. Матвей Лыткин хаалыктаах хаамыы техникатын, кистэлэҥин «Тэтим» түмсүү чилиэттэригэр көрдөрдө, сүбэ-ама биэрдэ. Ыйытыктарга хоруйдаата, аһаҕас кэпсэтии буолла. Матвей Лыткинҥа, Виктор Эверстовка нэһилиэк баһылыга Иван Ноговицын махтал суругун туттардылар.
Надежда Сивцева