Хатыҥ Арыы нэһилиэгэр уу ситимигэр холбонуу тэтимнээхтик ыытыллар. «Спектр» МАУ дириэктэрэ Сергей Парников иһитиннэрбитинэн, олохтоох дьаһалта 400 тыһ. суумаҕа уу ситимин өрөмүөнүгэр пластиковай турба, араас мал-сал ылбыттар.
Сааскы халаан улаханнык кэлэн уу ситимин холбуурга кэккэ ыарахаттары көрсүбүттэр. Билигин Аппааныга уу ситимин өрүмүөнэ бара турар, манна Федор Сивцев үлэлиэҕэ. Аппааныга бэҕэһээ Левина аат. уулуссаҕа алдьаныы баара оҥоһулунна. Озернай кварталга элбэх алдьаныы сылын аайы тахсар, манна саҥа дьиэ туттааччылар техниканнан турбалары тоҕута тэбистэрэллэрэ тахсар. Кыайыы 50 сыла уулусса соҕуруу өттүн киин утаҕын пластик турбаҕа уларытыы үлэтэ барыаҕа. Былырыын Аппааны нэһилиэгин уутун носуоһа умайан, быйыл саҥаны ылыахтаахтар.
Граф Биэрэгэр өрүмүөн бара турар, водопроводчик Тимофей Сметанин. Кыһыл Дэриэбинэҕэ бэс ыйын 1 күнүттэн уу ситимэ холбонон үлэлии турар, водопроводчик Артур Кривошапкин үлэлиир.
Сыллата олохтоох дьаһалта көҕүлээһининэн олохтоохторго чэпчэтиилээх акция оҥорор. Быйыл эмиэ ыам ыйын 30 күнүттэн бэс ыйын 15 күнүгэр диэри акциянан үс ыйга 3000 солк. төлүөхтэрэ. Акция кэннэ биир ый төлөбүрэ 1500 солк. буолуоҕа. Нэһилиэк общественниктара, нэһилиэк, улуус ытык дьоно 100 % чэпчэтиинэн туһаныахтара, «Хотой» ДНД чилиэттэригэр 50% чэпчэтии көрүллэр.
Быйыл сайын кураан дьыл буолар диэн билгэлииллэр, онон сайын устата уубут ситимэ этэҥҥэ үлэлээн, олохтоохтор өлгөм оҕуруот аһын олордон, үгүс үүнүүнү ылыахтара диэн эрэнэбит.
Надежда Сивцева