Аксинья Ноговицына, пенсионер, Хатырык нэһилиэгин олохтооҕо:
—Оскуолабытыгар тэриллибит ПВР-га бастаан 400-тэн тахса этибит, билигин да 200-чэ киһи баар, уу түһэн сорохтор дьиэлэригэр бардылар. Уот оскуолаҕа эрэ баар. Бэҕэһээ маймаҕалары быыһыыр сулууспа үлэһиттэрэ КСК-гар баар ПВР-га илтилэр. Күҥҥэ үстэ итии аһылыгынан хааччыйаллар, гуманитарнай көмө кэлэ турар, хааччылыы үчүгэй. Бэҕэһээ улуус баһылыга Юрий Иннокентьевич Слепцов манна кэлэн көрсөн барбыта.
Дьиэм сыыр үрдүгэр турар, ол үрдүнэн халаан уута дьиэбин түннүгүнэн ылла. Докумуоммун хомунуохпар диэри уу бэрбээкэйбинэн ыла охсубута. Дьиэбэр кэлээскэҕэ олорор 1 гр. инбэлиит уолбун кытта иккиэн олоробут, хата, балыыһа суһал көмөтүн үлэһиттэрэ кинини эрдэ ылан Намҥа илдьибиттэрэ.
Дьиэм иһин нэһиилэ киирэн көрдүм. Холодильнигым, морозильнигым, телевизорым, миэбэлим, таҥаһым-сабым барыта ууга былдьанна. Тэлгэһэм күөрэ-лаҥкы түһэн турар, хотонум билигин да ууга олорор, үрдэ эрэ көстөр. Хата, билигин куораттан МЧС-тар элбэх буоланнар, кыһалҕабытыгар көмөлөһөллөр. Боппуолдьабыттан уу оботторуутугар сайаапка биэрдим.
1968 сыллаахха халаан уута кэлэ сылдьыбыта да, мантан кыра этэ. Онтон 1998 с. уу син кэлбитэ эрээри, дьиэм турар сыырын ылбатаҕа. Бу халаан уута бөһүөлэкпитин улаханнык ылла.
Касьян Олесов-Олук