Нам улууһун дьаһалтатын 2023 с. үлэтин отчуотун Хатырыкка нэһилиэк баһылыгын эппиэтинэһин толорооччу Артур Ноговицын иилээн-саҕалаан ыытта. Кини урукку өттүгэр баһылык солбуйааччытынан ситиһиилээхтик үлэлээбитэ ахтылынна.
Улуус дьаһалтатын үлэтин видеонан билиһиннэрии кэнниттэн, Юрий Дьяконов олохтоохтор ааспыт сыллааҕы туруорсууларын, ыйытыыларын туолуутун билиһиннэрдэ. Ол курдук, эдэр ыаллар дьиэнэн хааччыллыыларын программатыгар өрөспүүбүлүкэ бюджетыттан көрүллэр субсидия сууматын үрдэтиигэ үлэ барарын, улууска «Синтай», «Беларусь» тыраахтардар өрөмүөннэрин тэрийиигэ үлэ бастакы хардыылара оҥоһуллубуттарын, чуолаан, Хатырыкка автосервис арыллан үлэлиирин, оскуолаларга педагог эр дьон учууталлыылларын ситиһэргэ федеральнай таһымҥа учуутал статуһун үрдэтиигэ үлэлэһэллэрин, СӨ Государственноһын историятын түмэлигэр «Ыччат парламенын» тэрийэн үлэлэтиигэ өрөспүүбүлүкэ таһымыгар туруорсуу барарын, Хатырыкка аҕыйах ахсааннаах баһаарынай чаас саҥа дьиэтин тутууга акылаата түспүтүн, хантан үбүлэнэригэр үлэ барарын, билигин үс өрүттээх сөбүлэҥ түһэрсиллэн илии баттаннаҕына тутуу салгыы ыытыллыаҕын билиһиннэрдэ.
Кэпсэтиигэ олохтоохтор кыһалҕаларын туруорустулар, ыйытыыларын биэрдилэр. Хаарбах дьиэттэн дьону көһөрүү программатынан тутуллубут дьиэ хаачыстыбата мөлтөҕө үгүстэри долгутара көһүннэ. Ону туоратары, уопсай дьиэ таһын сырдатыытын төлөбүрүн, аадырыс уларыйыытын түргэтэри, территория сыһыарылларын, септик оботторуутун быһаарары туруорустулар. Итини сэргэ бөх былаһааккатын эбии туттарары, Дьокуускай-Нам-Хатырык маршрут оптуобуһун сырыытын графигын саҥаттан көрөргө, эдэр исписэлиистэри дьиэнэн хааччыллыы программатыгар хайдах хапсары, инбэлиит, кыаммат дьоҥҥо болҕомтону, социальнай көмөнү күүһүрдэргэ, М.К. Аммосов төрөөбүт түөлбэтин тупсарыыны, СӨ Государственноһын түмэлэ филиалтан үрдээн, бас статустанарын ситиһэри, түмэл иһинэн «Ыччат парламенын» тэрийиини о.д.а. болҕомтоҕо ылалларын эттилэр, туруорустулар.
Нам улууһуттан Ил Түмэҥҥэ депутат Александр Атласов нэһилиэктэр туруктарын , туох-ханнык кыһалҕа баарын билсээри улуус баһылыгын отчуотугар сырытта.
Түмүккэ Юрий Вячеславович этиилэр боротокуолга киирбиттэрин, онон үлэ ыытыллыаҕын эттэ. Биир дойдулаахтарын ааттарыттан «Сайдам» норуот айымньытын дьиэтин дириэктэрэ, нэһилиэк депутата Елена Ефремова саҥа үрдүк дуоһунаска анаммытынан Юрий Вячеславовиһы истиҥник эҕэрдэлээтэ, улуус дьаһалтатыгар ситиһиилээх үлэни баҕарда, сэмэй бэлэх туттарда. Хатырыктар «Нам улууһа» МТ дьаһалтата 2023 с. ыыппытын үлэтин биһирииллэрин биллэрдилэр. Мунньахха 60 киһи кытынна.
Касьян Олесов-Олук