2023 сылы Арассыыйа Президенэ В.В. Путин Педагог уонна Наставник сылынан биллэрбитэ. Бу орто дойдуга кэлбит хас биирдии киһи олоҕор үтүөкэн дьону көрсөн, кинилэр үөрэтиилэринэн, такайыыларынан сайдан-үүнэн иһэр, сүбэ-ама ылан, элбэххэ үөрэнэр.
Биир оннук киһинэн мин олохпор Петров Александр Данилович буолар. Кини 50-чэ сыл Нам сирин дьонун-сэргэтин доруобуйата чөл буоларын туһугар үтүө суобастаахтык үлэлээбитэ, эдэр коллегаларыгар холобур буолар.
Александр Данилович ыарыһахтары эмтиирин таһынан, араас хабааннаах профилактичекай үлэни элбэхтик ыытара. Ол курдук, үлэтин кэнниттэн улуус оскуолаларын барытын кэрийэн арыгы, табах, наркотик буортутун туһунан сиһилии кэпсиирэ, элбэх нагляднай пособиелары илдьэ сылдьара. Ол кэпсээбитэ мээнэ хаалбатах буолуохтаах, билиҥҥи ыччат чөл олохтооҕо барыбытын да үөрдэр.
Поликлиника сэбиэдиссэйинэн, нарколог бырааһынан да олорон, үлэтин таһынан нэһилиэк, улуус олоҕор көхтөөх кыттыыны ылара. Ол курдук, олус талааннаах коллегаларын Жирков С.С., Никонов В.Е., Винокурова М.М. уо.д.а. кытта, Нам улууһун народнай театрыгар артыыс быһыытынан араас таһымнаах спектакльга кытталлара, өрүү көрөөччү биһирэбилин ылаллара. А.Е. Кулаковскай ”Сэттэ мэтириэтигэр” саха дьахталларын олус үчүгэйдик эдэр коллега уолаттарын кытта оонньоон көрдөрбүттэрэ билиҥҥээҥҥэ диэри уос номоҕо буолар. Биир ыһыахха, Эмчит күнүгэр, сценаҕа “Танец маленьких лебедей” үҥкүүлээбиттэрэ үрдүк биһирэбили ылбыта. Талааннаах киһи барытыгар талааннаах дииллэрэ олус сөп эбит. Ол курдук, кини кэрэ куолаһынан «Тойбохойун» ыллаатаҕына, харахпытыгар Сахабыт сирин биир маанылаах сирэ — Сунтаар кэрэ айылҕата көстөн кэлэргэ дылы буолара.
Александр Данилович дьиэ кэргэнигэр саамай тутаах киһи этэ, кини кэргэнинээн үс оҕолорун иитэн, такайан үлэһит оҥортоотулар. Аҕаларын туйаҕын хатаран кыыстаах уола быраас идэтин баһылаан үлэлии сылдьаллар.
Варвара МАКСИМОВА, СӨ үтүөлээх бырааһа, РФ доруобуйа харыстабылын туйгуна