П.П. Ядрихинскай-Бэдьээлэ аатынан Намнааҕы Олоҥхо дьиэтин үлэһитэ Ирина Неустроева салайааччылаах 16 аҕам саастаахтар “Алгыс” вокальнай ансамбль түмсүүтүгэр олунньу 19 күнэ – үөрүүлээх түгэни тосхойдо. Ол курдук, биһиги Москва куоракка Кыһыл болуоссакка, Кремльга норуоттар икки ардыларынааҕы “Зал Дипломатии” фестивальга сырыттыбыт.
Бу улахан ис хоһоонноох, дьоһун тэрээһин. Хас биирдиибитин, төрөөбүт-үөскээбит дойдубутун көмүскүүр хорсун-хоодуот саллааттарбыт олохторун сырдатар, үйэтитэр, кинилэр тустарынан сиһилии кэпсиир киинэлэри устар, өлбөөдүйбэт, умнуллубат мэтириэттэрин уруһуйдаан быыстапка оҥорор тэрээһиннэри сырдатар фестиваль.
Кремльга бу дьоһун тэрээһиҥҥэ ыҥырыллан кыттыбыппыт биһиги олохпутугар хаһан да умнуллубат өйдөбүл буолла. Бу манна кыттарга сабыдыаллаах убаастыыр, киэн туттар дьоммутугар – салайааччыбытыгар Ирина Неустроеваҕа, Олоҥхо Дьиэтин дириэктэригэр Вера Колпашниковаҕа, хорсун саха буойун ийэтигэр Альбина Винокуроваҕа махтанабыт!
Иллээх, дьоллоох олох туругурдун!
Наталья Слепцова