Инбэлииттэр Аан дойдутааҕы күннэригэр аналлаах декада чэрчитинэн уонна Россияҕа Ийэ күнүн көрсө, сэтинньи 19 күнүгэр Үөдэй нэһилиэгэр “Иһирэх ийэлэр” улуустааҕы тэрээһин буолан ааста.
Бу күн ыалдьыттары “Ийэҕэ албан аат” түмэлгэ салайааччы Алексей Яковлев көрсөн, нэһилиэк историятын, 14 Герой ийэлэр тустарынан иһирэхтик кэпсээтэ. Ыалдьыттар түмэли сөҕө-махтайа көрөн, үрдүктүк сыаналаатылар. Маны тэҥэ, байыаннай дьайыыга сылдьан сырдык тыынын толук уурбут Иван Яковлевка аналлаах быыстапканы долгуйа көрдүлэр.
Ол кэнниттэн И. Зырянов аатынан култуурнай-спортивнай комплекс дьиэтигэр итии үүттээх чээй, минньигэс остуол тула “Иһирэх ийэлэр” күрэх ыытылынна. Күрэх Үөдэй нэһилиэгин инбэлииттэрин сүбэтин бэрэссэдээтэлэ Анастасия Семеновна Сысолятина көҕүлээһининэн, Үөдэй дьаһалтатын уонна “Сарыал” сынньалаҥ киин өйөбүлүнэн ыытылынна. Уопсайа 7 кыттааччы үс түһүмэххэ күрэхтэстэ. Бэйэни билиһиннэрии, талба талаан, ийэ кэрэ көстүүлээх буоларыгар киэһээҥҥи мааны былааччыйа түһүмэхтэргэ кыттыыны ыллылар.
Ол курдук, Зоя Дмитриевна Платонова (Үөдэй), Светлана Ивановна Попова (Хатырык), Светлана Владимировна Ядреева (Хамаҕатта), Александра Афанасьевна Соловьева (Бөтүҥ), Вера Ивановна Кривошапкина (1-Хомустаах), Мария Степановна Чирикова (Хатын-Арыы), Варвара Аркадьевна Охлопкова (Ленскэй). Түмүккэ дьүүллүүр сүбэ быһаарыытынан 3 анал ааттар туттарылыннылар, «Хомоҕой тыллаах иһирэх ийэ» Бөтүҥ нэһилиэгиттэн — Александра Соловьева, «Талба талааннаах иһирэх ийэ» — Хатырык нэһилиэгиттэн Светлана Попова, «Кэрэ көстүүлээх иһирэх ийэ» Нам сэлиэнньэтиттэн Варвара Охлопкова ыллылар.
Бары ийэлэри, кэлбит ыалдьыттары нэһилиэк баһылыга Иван Васильевич Гаврильев эҕэрдэлээтэ уонна Үөдэй нэһилиэгин бастыҥ көхтөөх чилиэннэригэр махтал суругу туттарда.
Екатерина Эверстова