Саха сиригэр Оҕо, Россияҕа Дьиэ кэргэн сыллларынан, Ийэ күнүн чэрчитинэн Дьокуускайга бастыкытын доруобуйаларыгар хааччахтаах ийэлэргэ, оҕолорго сүдү ис хоһоонноох, олоххо бэриниилээх, тирэхтээх буолууну көҕүлүүр «Ийэ кыыһынаан» куонкурус буолан ааспыт.
Куонкуруска биир дойдулаахтарбыт Октябрина Барашкова кыыһынаан Уйгуланалыын ситиһиилээхтик кыттыбыттарын туһунан, Нам уулууһун инбэлииттэрин обществотын председателэ Марина Литвинова үөрүүтүн үллэһиннэ.
Куонкурус өрөспүүбүлүкэтээҕи доруобуйаларынан хааччахтаах дьон обществотын председателэ Ирина Лебедева көҕүлээһининэн, СӨ идэлээх сойуустарын федерациятын дьиэтигэр ыытыллыбыт. Мэҥэ Хаҥаластан, Тааттаттан, Намтан, Алдантан, Мирнэйтэн, Бүлүүттэн, Чурапчыттан, Горнайтан, Хаҥаластан, Уус Алдантан Дьокуускайтан кыттыбыттар. Нам улууһун чиэһин көмүскүү Хамаҕаттаттан «Тускул» оҕо сайдар киинигэр эбии дьарык педагогунан үлэлиир, түөрт оҕо амарах ийэтэ (3 уол, 1 кыыс), тапталлаах кэргэн Октябрина Сергеевна кыыһынаан Уйгулааналыын II миэстэ буолары ситистилэр. Уйгулана В.П. Артамонов аатынан Хамаҕатта саха-француз лицейин 3-с кылааһын үөрэнээччитэ.
Марина Литвинова: «Күн бастакы аҥарыгар ийэлэргэ аналлаах бэрт суолталаах, кэрэхсэбиллээх «Аныгы обществоҕа дьахтар оруола» диэн төгөрүк остуол ыыппыттара. Кэпсэтиигэ өрөспүүбүлүкэ дьахталларын обществотын Сойууһун председателэ, «Харысхал» аһымал пуондаттан, доруобуйаларынан хааччахтаах оҕолор төрөппүттэрин обществотын өрөспүүбүлүкэтээҕи салаатын председателэ, «Аврора» медицина кииниттэн, үтүөнү оҥорор «Движение первых» обществоттан кыттыыны ыллылар. Олус туһалаах бэсиэдэ буолла, үгүс ыйытыылары биэрэн сөптөөх хоруйу ыллыбыт. Бу кэмҥэ оҕолору аралдьытан маастар-кылаастары тэрийэн ыыттылар.
«Ийэ кыыһынаан» куонкурус үс түһүмэхтээх буолла. Ол курдук, кыттааччылар бэйэлэрин билиһиннэрдилэр, талааннарын көрдөрдүлэр уонна киэһээҥҥи таҥаһы кэтэн хаамтылар. Ийэлэри баттах оҥорооччулар, визажистар кэлэннэр олус кыраһыабай гына оҥорон кэбиспиттэрэ көрүөхтэн кэрэ буолла. Бииртэн биир талааннаах кыттааччылар тахсан истилэр.
Октябриналаах Уйгулананы өйөөн, «ыалдьан» коллективыттан, нэһилиэгиттэн уонна үс эдьиийдэрэ кэлэннэр күүс-көмө буоллубут. Ситиһиилэринэн эҕэрдэбин тиэрдэбин. Куруутун бу курдук көхтөөх буолуҥ, дьиэ кэргэҥҥитигэр ил-эйэ эрэ тосхойдун, дьоллоох буолуҥ. Нам улууһун дьиэ кэргэн уонна ыччат политикатын отделыгар махталбытын биллэрэбит».
Доруобуйаларынан хааччахтаах дьоҥҥо улахан болҕомто ууруллан улахан да киһи, оҕо да маннык тэрээһиҥҥэ кыттан кынаттаналлара, куорсун анньыналлара, бигэ санаалаах буолаллара саарбаҕа суох.
Семен Аргунов
Хаартыскалары Марина Литвинова тиксэрдэ