Дойдуга Дьиэ кэргэн сылынан уонна Россия ийэлэрин күнүн чэрчитинэн, М.К. Аммосов аатынан култуура уонна духуобунас дыбарыаһыгар улуустааҕы “Ийэҕэ махтал” тэрээһин буолан ааста.
Тэрээһин дириҥ ис хоһоонноох, дьиэ кэргэн сыаннастарын бөҕөргөтүүгэ, харыстыырга, киэҥник тарҕатыыга уонна үгэстэрин сыаналыырга туһуланан ыытылынна. Бастакы чааһыгар “Отуу уота” литературнай түмсүү чилиэнигэр, сэрии сылын оҕотугар, “Иэйии” ветеран кулуубун көхтөөх аҕам саастаах кыттааччытыгар Варвара Куприяновна Поповаҕа – Талаһалаах кыыһыгар СӨ “Бочуоттаах Ытык кырдьаҕаһа” анал бэлиэни туттардылар. Күн сирин көрдөрбүт 6 оҕолоро, дьиэ кэргэнэ, сиэннэрэ, хос сиэннэрэ, биир дойдулаахтара, чугас дьонноро истиҥ иһирэх тылынан эҕэрдэлээтилэр.
Улуустааҕы “Ийэҕэ махтал” тэрээһиҥҥэ З.П. Саввин аатынан Үөдэй орто оскуолатын “Ийэҕэ албан аат” түмэл салайааччыта Алексей Дмитриевич Яковлев “Үөдэй нэһилиэгин Герой ийэлэрэ” быыстапканы туруоран тэрээһин ис хоһоонун дириҥэтэн биэрдэ.
Маны сэргэ, үөрүүлээх, долгутуулаах түгэнинэн улуус баһылыга Юрий Иннокентьевич Слепцов олохтообут “Бастыҥ ийэ” наҕараадатын уонна 10 тыһыынчалаах сертификаты 19 күн күбэй ийэлэргэ туттарыы буолла. Үөрүүлээх быһыыга-майгыга улуус баһылыгын социальнай боппуруостарга солбуйааччы Егор Протопопов үрдүк сыанаттан ийэлэргэ махтанна. Ол курдук, бу үрдүк наҕарааданы Үөдэйтэн 8 оҕолоох Евдокия Алексеева, Фрунзеттан 6 оҕолоох Мария Барамыгина, Таастаахтан 4 оҕолоох Нелла Винокурова, Искраттан 5 оҕолоох Мотрена Дьяконова, Бастакы Хомустаахтан 5 оҕолоох Роза Егорова, Ленскэй нэһилиэктэн 4 оҕолоох Екатерина Елисеева, Хамаҕаттаттан 8 оҕолоох Анна Заровняева, Арбынтан 4 оҕолоох Мария Иванова, Модуттан 5 оҕолоох Любовь Катакинова, иккис Хомустаахтан 5 оҕолоох Анастасия Колесова, Бөтүҥтэн 8 оҕолоох Елена Павлова, Хатырыктан 7 оҕолоох Евдокия Парникова, Түбэттэн 5 оҕолоох Дария Попова, Салбаҥтан 4 оҕолоох Альбина Посельская, Никольскайтан 5 оҕолоох Прасковья Протопопова, Партизантан 8 оҕолоох Джулуяна Саввинова, Хатыҥ Арыыттан 5 оҕолоох Лена Сивцева, Маймаҕаттан 4 оҕолоох Лена Слепцова, Көбөкөнтөн 4 оҕолоох Лена Петрова туттулар.
“Бастыҥ ийэ” аатын бииртэн биир чаҕылхай, улуус сайдыытыгар, оҕону иитиигэ, дьиэ кэргэни бөҕөргөтүүгэ тус кылааттарын киллэрсибит ийэлэр наҕараадаламмыттарынан көрөөччүлэр киэн туттан, сүһүөхтэригэр туран ытыс тыаһынан бигэргэттилэр.
Екатерина Эверстова