Каток кэмэ бүппүтүнэн, Нам сэлиэнньэтигэр икки көлүөнэ хоккей оонньооччулара сибиэһэй салгыҥҥа көрсөннөр санаа атастаспыттар, инники былааннары кэпсэппиттэр.
Таһырдьа сылаас күннэр турбуттарынан, түмсүүлэр, тэрилтэлэр, табаарыстар ситиһиилэрин, үлэлэрин шашлыктаан ырытар, бэлиэтиир күннэрэ үүннүлэр. Ол курдук, аҕам саастаах хоккеистар улаатан эрэр хоккей оонньуур уолаттары Анатолий Аргунов сиригэр-уотугар “Город мастеров” ыалдьыттатан шашлыгынан күндүлээбиттэр, аһаҕас кэпсэтиигэ ыҥырбыттар. Каток сезонун түмүктүүр тэрээһини, көлүөнэлэр көрсүһүүлэрин, иккис сылын КСК-ҕа баар катогу салайан үлэлэтэр Владислав Корякин уонна Артём Аманатов көҕүлээһиннэринэн тэриллибитин ветеран хоккеист Василий Кириллин этэр. Энтузиаст дьон аны күһүн муус турда да, оҕолорго күрэхтэһии оҥорор баҕа санаалаахтар эбит.
“Хоккей – эккэ-сииҥҥэ эчэйии ылыахха сөбүнэн ааҕыллар сэрэхтээх оонньуу. Инники былааннарга туох киирэр эбитий? Хоккей ирдэбилэ модьуйарынан, экипировка! Вратарь таҥаһа-саба, клюшка. Ону тэҥэ, сезон бириэмэтигэр секция тэрийии туһунан толкуйдар бааллар. Оччоҕо сайдыы өссө ордук тахсара өйдөнөр.
Наммытыгар сааскы сылаас күннэр үүннүлэр да, оҕолорбутугар хоккей оонньуутун тэрийэбит. Биллэн турар, биһиэхэ Петр Сокольников баһылыктаах Ленскэй нэһилиэк олохтоох дьаһалта күүс-көмө буолар. Оҕолорго күрэхтэһиилэри ыытарга МВД ветераннара Андрей Атласов уонна Петр Собакин төһүү күүс буолаллар. Холобура, былырыын күрэхтэһиибитин Нэлэгэр түөлбэҕэ Василий Бугаев үлэлэтэр катогар оҥорбуппут. Онно эбии шорт-трек түһүмэҕэ баара. Маны тэҥэ, өссө кёрлинг көрүҥэ сайдара буоллар”, – диир Василий Кириллин.
Быйыл КСК катогар Куонда Кириэс хамаандата кыайбыт буоллаҕына, былырыын “Нэлэгэр” оонньооччулара бастаабыттар эбит. Оттон 2024 сыллаах хоккейга Үөдэй уолаттара боруонса мэтээллэри кэппиттэрэ.
Харысхан Попов