Салбаҥ нэһилиэгэр П.Е. Соловьёв аатын үйэтитэр сыаллаах дартс күрэхтэһиитэ буолан ааста. Пётр Егорович үлэ, тыыл ветерана, кадровай булчут, «Нам», «Комсомольскай» совхозтар чемпион булчута этэ. Кини булт соноругар бырааттарын, сиэннэрин үөрэппитэ. Бэйэтэ айылҕаттан бэриллибит күүстээҕэ, спортсмен буолар кыахтаах эрээри, онтун көрдөрбөт-биллэрбэт майгылааҕа. Бу тэрээһиҥҥэ сэмэй, үлэһит үтүөтэ киһи кэлэн ааспытын ахтан-санаан аастылар, күрэхтэһии киниэхэ ананарын эттилэр. Кини оҕолоро, сиэннэрэ бириис туруоран, күрэхтэһиини көҕүлээтилэр.
Күрэхтэһиигэ 22 киһи кытынна. I разрядтаах дартсмен Дмитрий Васильевич Кривошапкин кыыһынаан Тамара Дмитриевналыын судьуйалаатылар. Күрэхтэһии «Большой раунд+булл», «Набор очков», «Сектор 20» көрүҥнэринэн ыытылынна. Дротиктар, кыра охтор курдук, харса суох кыырайдылар. Илии улук буолуор диэри быраҕыы буолла. Ким сиирэ-халты түһэрэн кыһыйда, ким сыалга түһэрэн үөрдэ-көттө.
Дьахталларга I м. Вероника Данилова, II м. Марфа Корякина, III м. ийэлээх кыыс Тамара Никифорова, София Степанова үллэһиннилэр. Эр дьоҥҥо Пётр Лугинов, Иван Данилов, Иннокентий Посельскай, Андрей Находкин элбэх баалы ылан, инники күөҥҥэ тахсан, бириистээх миэстэҕэ тигистилэр. Биристээх миэстэҕэ тиксибиттэр грамоталарынан, мэтээллэринэн наҕараадаланнылар, кыайыылаахтар кубоктарынан бэлиэтэннилэр.
Дмитрий Кривошапкин дротигы хайдах таларга, быраҕарга маастар кылаас ыытта. Дартс күрэхтэһиитигэр кыттан, үөрэтииттэн баһаам уопут ылбыппыт иһин тэрийээччилэргэ – П.Е. Соловьёв оҕолоругар, сиэннэригэр уонна Дмитрий Кривошапкиҥҥа, Тамара Афанасьеваҕа махтанабыт.
Татьяна Касьянова