З.А. Тихонова аатынан Намнааҕы «Түөлбэ» оҕо киинин салалтата үөрэнээччилэр кыра саастарыттан эргиэн эйгэтигэр сысталларыгар, сатаан харчыны ааҕа уонна бизнес бырайыактары суруйа үөрэнэллэригэр сүрүн болҕомтотун ууран үлэлэһэр. Ол курдук, сылын аайы олунньуга аһаҕас бизнес-бырайыактар күрэхтэрин тэрийэллэр.
Быйылгы күрэххэ олунньу 27 күнүгэр 14 үөрэнээччини хабан, бырайыактарын билистибит. Бизнес бырайыактар «Түөлбэ» оҕо киинигэр дьарыктанар оҕолортон уонна Салбаҥ орто оскуолатын үөрэнээччититтэн киирдилэр. Хомойуох иһин, атын оскуолалар суолта биэрэн оҕолорун кытыннарбатылар.
Маннык күрэхтэргэ оҕо сайдан, кэлин бэйэ дьыалатын арынарыгар төһүү күүс буолуо диэн Нам улууһун индивидуальнай предпринимателлэрэ сылын аайы күүс-көмө буолаллар, бириистэри туруораллар. Ол курдук: Новгородов Б.Г. («Копир+»), Серебренников М.В. («Ганза» Супермаркет), Петров Н.Н. (ООО «Уником»), Феоктистов М.В. (М-н «Хозмаркет»), Дохунаев С.Ю. (М-н «Эркин»), Аммосова Е.С. (М-н «Книжный мир»), Кривогорницын В.Ю. (М-н «Lakshmi»), Дьячковская С.Р. (М-н «Север»), Аммосова К.К. («Урсун» студия), Дмитриева Л.В. (Кафе «Фудмания») уонна «Мой бизнес» Намнааҕы салаатын салайааччыта Тарабукина М.С. кыайыылаах оҕолорго бириистэрин бэлэхтээтилэр.
Спонсордарбытыгар ис сүрэхпититтэн махтанабыт уонна инники үлэлэригэр ситиһиилэри баҕарабыт. Кинилэр көмөлөрө суох бу бырайыак салгыы сайдыбат, онон инникитин да бииргэ үлэлэһиэхтэрэ диэн эрэнэбит.
А.С. Павлова, «САЙДЫС» бизнес-инкубатор салайааччыта