«Нам улууһа» МТ дьаһалтатын 2024 сыллааҕы үлэтин отчуоттуур Анатолий Павлов салайааччылаах 2-с бөлөҕө Арбын кэнниттэн Көбөкөн олохтоохторугар отчуоттаата.
Ааспыт сыллааҕы отчуот боротокуолугар киирбит туруорсуулары ырытыыттан ылан көрдөххө, үөрэх тэрилтэтин үлэһиттэригэр ититии уонна уот төлөбүрүгэр көрүллэр толуйуу бырыһыанын үрдэтиини туруорсубуттара билигин да салалтаҕа быһаарыы үлэтэ барыахтааҕын эттилэр. Маймаҕаттан биэрэккэ киирии суол өрөмүөннэммит. Ааспыт кыстыкка хочуолунай оһохторо кыһалҕаны үөскэппиттэрэ быһаарыллан, бу кыһыны этэҥҥэ туораан эрэллэр. Оскуола музейыгар үлэһит тутууну оскуола иһинэн быһаарыллар диэн буолла. туһаныллыбат буолбут «Ростелеком» остуолбаларын ыраастыылларыгар этиммиттэрэ, үптэн иҥнэн турар.
Уот уонна ититии ситимин тарыыбыгар ыйытыылары биэрдилэр. «Намкоммунтеплоэнерго» АО ититии биэрэр өҥөтүн гарааска уонна баанньыкка тарыыба үрдүөҕэ диэн оруна суох сурах дьону долгуппут. Үрдүүр түгэнигэр нэһилиэнньэҕэ биллэрэр-иһитиннэрэр сурук кэлиэхтээҕин эттилэр. Иккис хочуолунай туруорсаллар эбит да, тустаах тэрилтэ былааныгар суох эбит. Нэһилиэк оскуолатыгар «Земскэй учуутал» программанан үлэлиир учуутал олорор усулуобуйа ыараханын эттэ. Инникитин үлэлии кэлэр учууталларга, специалистарга табыгастаахтык олорон үлэлииллэригэр-хамныылларыгар болҕомто ууруллуон наадатын эттэ. Учууталлар үөрэххэ сыһыаннаах балай эмэ этии киирдэ. Онтон сүрүнүнэн, үөрэх кинигэтэ тиийбэт, материальнай базата (инвентарь) эргэрбитин эттилэр.
Суола-ииһэ ыарахаттардаах нэһилиэнньэлээх пууҥҥа сокуон ирдэбилинэн оҥоһуллубут бөх быраҕар балаһааккалар олоххо киирэн баран, көрүүтэ-истиитэ мөлтөх буолан нэһилиэк көстүүтүн буортулуур диэн санааларын эттилэр.
Тыа хаһаайыстыбатын салаатыгар, быйыл үбүлээһин боломуочуйатын бэйэни салайыныыга бэриллибит саҥа уларыйыы туох суолталааҕын, ынахтан төрүөх ылыыга оҕус суоҕа кыһалҕа буолбут. Итиэннэ искусственнай буоһатыы хайдах тэриллэрин ыйыттылар.
Улуус киинигэр барыы-кэлии кыһалҕата саас тибии саҕана уонна сайын өрүһүнэн сырыы кэмигэр баалларын ыйдылар. Ол курдук, өрүс суолун астарыыга кэпсэтии буолан ылла. БМК мотуорун өрөмүөннэтэн бириэмэтигэр бэлэм буолара буоллар диэтилэр. Булт-алт сокуонугар, доруобуйа харыстабылыгар сыһыаннаах долгутар боппуруостарын чопчуластылар.
Тутуу салаатыгар, специалистарга анаан алта квартиралаах дьиэ тутуллан иһэн тутааччылартан сылтаан харгыстанан тохтоон турар. салгыы тутулларыга үлэни ыыталлар. Нэһилиэккэ 5 дьиэ хаарбах туруктааҕынан биллэриллэн турар. «Хаарбах уонна саахалланар туруктаах дьиэлэртэн дьону көһөрүү» программа 3-с түһүмэҕэ саҕаланарын кэтэһэллэр. Нэһилиэнньэҕэ анаан балаҕан тутуутун көҥдөйө бүтэн турар, ППМИ программанан паарка саҥардыллыбыт, оскуолаҕа өрөмүөн үлэтэ ыытыллыбыт.
Биир сүрүн, тыын боппуруоһунан оскуола тутуута олохтоохтору долгутар. Туруорсубуттара ыраатта. Хас ыйытыы биэрэр, этии этэр киһи бу боппуруоһу тумнубата, ис дууһаларыттан, санааларыттан, иэйэн туран оскуола тутуутун туруорустулар. Ааспыт сылларга сыыһа-халты туттунууттан, дьаһаныыттан оскуола тутуута уһаан-кэҥээн биэрбит. Билигин бырайыактыыр, экспертизалыыр докумуон оҥоһулла сылдьарын эттилэр.
Отчуокка Ил Түмэн председателэ Алексей Еремеев, Ил Түмэн тыа хаһаайыстыбатыгар уонна аграрнай политикаҕа сис комитетын председателэ Александр Атласов кыттыыны ылан, олохтоохтор санааларын истэн балаһыанньаны быһааран, саҥа уларыйыылары сиһилии ырытан биэрдилэр.
«Нам улууһа» МТ ааспыт 2024 сыллаах үлэтин биһириилэрин биллэрдилэр. Улууспутугар үгүс үлэ ыытылларын бэлиэтээтилэр. Нэһилиэккэ ыра буолбут кэскиллээх үлэ – оскуола тутуута саҕаланыаҕа диэн эрэллээх хааллылар.
Семен Аргунов