Тохсунньу 27 күнэ – Ленинград куорат блокадаттан босхоломмут күнэ
Мин Ленинград блокадатыгар өлбүт дьүөгэм Таня Монастырева кэриэһигэр хоһоон сыыһа суруйдум.
Таня мин илиибэр өлбүтэ. Өлөр охтуутугар сытан аттыгар куруук баар буоларбын сөбүлүүрэ. Дойдубутун, оскуолабытын, учууталларбытын, бииргэ үөрэммит оҕолорбутун ахтан кэпсэтэрбит. Мин дойдум хатыҥын анныттан ылан илдьэ сылдьар буорбун дьүөгэм сирэйигэр сыһыары тутарым, оччоҕуна кини наһаа үөрэн сыллаан ылара.
- Хайаан да тыыннаах тиийээр, — диэн өрүү алгыыр этэ…
Кэллим соҕотоҕун…
Кэллим мин соҕотоҕун
Былырыын баччаларга
Кууһан туран сыллаабыт
Таанньабыт хатыҥар.
Кэллим мин соҕотоҕун
Курус, санньыар санаабын
Эн намчы сэбирдэххэр
Аҕыннаран ааһаары.
Кэллим мин соҕотоҕун
Биһи ыраас ырабытын
Фашист үлтү тэптэрбит
Буомбатыттан ордоммун.
Булгуруппатаҕа буолбаат
Дьоруой норуот санаатын
Тоҕус сүүсчэ хонуктаах
Суостаах уоттаах уобуруччу.
Тыыннаах хаалпыт биһиги,
Өлбүттэр үгүстэр.
Кэрэ дьүөгэм Таанньа кыыс
Сырдык тыына быстыбыта.
Укпутум мин суулааммын
Хатыҥ буорун хоонньугар
Үтүө кэммит кэрэһитэ
Өйдөбүнньүк буоллун диэн.
Түүлгэ курдук, о, арай,
Өрө үүнэн таҕыстар
Таанньа буорун аттыгар
Биир итинник хатыҥ мас.

Татьяна Монастырева
Татьяна Кондратьевна ЯДРИХИНСКАЯ,
Ленинград блокадатын кыттыылааҕа, 1999 сыл, ыам ыйын 8 күнэ