Нам улууһун Аппааны сэлиэнньэтин Хатыҥ Арыытааҕы олохтоох библиотека сэбиэдиссэйэ Варвара Носкова 2023 сылтан библиотекатын түннүгэр 19 араас көрүҥ кактустары үүннэрэн саҕалаабыт. Варвара Дмитриевна кэпсииринэн, библиотекаҕа кэлбит ааҕааччылар кинигэ уларсалларын таһынан, кэрэни кэрэхсээн бараллара үөрдэр.
Ааспыт сылга библиотекаҕа 860 ааҕааччы сылдьыбыт. Икки сыллааҕыта саҥа аһыллыбыт култуура дьиэтин иһигэр баар олохтоох библиотекаҕа дьон-сэргэ үөрэ-көтө сынньанан барар. Библиотекаҕа ыйга биирдэ нэһилиэк коллекционердарын быыстапката теманан витранаҕа дьон дьүүлүгэр турар.
Ааспыт сылга Педагог уонна Наставник сылыгар анаан үөрэҕэрии эйгэтин үлэһиттэрин, учууталлар, бэтэрээннэр быыстапкалара турбут. Библиотека иһинэн «Далбар» дьахтар сүбэтэ кыттыылаах оҕуруо куруһуога үлэлиир, бэтэрээннэр, пенсионердар, наставниктар үгүстүк мустан мунньахтыыллар, сүбэлэһэллэр.
Быйыл Россияҕа Дьиэ кэргэн сылынан нэһилиэк түөлбэлэрин икки ардыгар «Ааҕар дьиэ кэргэн» күрэх үс түһүмэҕинэн ыытыллыаҕа.
Надежда Сивцева