Нам сэлиэнньэтэ ыраас буола туругура турарыгар тэрилтэ үлэһиттэрэ күргүөмүнэн субуотунньукка таҕыстылар.
Бу күннэргэ Нам тэрилтэлэриттэн 219 туруу үлэһит олорор сирин бөхтөн-сыыстан босхолоото. Намҥа сыл ахсын ыраастаныы күннэрэ тэриллэннэр, харах кырыыламмат ыраас уулуссаларынан хаамарбыт элбиир. Ити курдук, дьон үлэтэ сыаналанан сылтан-сыл сыыһырдыы, бөҕү таптаабыт сиргэ быраҕыы кэмэлдьитэ биллэрдик сүтэн-оһон эрэрэ бэлиэтэнэр.
Үтүө дьыалаҕа Намнааҕы педагогическай колледж 60 үлэһитэ; Намнааҕы 3-с №-дээх оскуола (23 киһи); улуустааҕы тыа хаһаайыстыбата (6); култуура управлениета (6); Оҕо искусствотын оскуолата (10), Пенсионнай фонда; дьарыктаах буолуу киин; Намнааҕы киин балыыһа (13); Намнааҕы баһаарынай сулууспа (12); “Эрэл” ТХПК (10); НКТЭ (15); үөрэх управлениета; Оҕо спорт оскуолата (9); “Сахатранснефтегаз” (13); ветеринарнай управление (15); “Якутлесресурс” (5); Намнааҕы лесничество (10); Ленскэй нэһилиэк олохтоох дьаһалтата кыттыһаллар, холобур буолаллар.
Суолга кичэллик сааһыламмыт улахан кээмэйдээх бөҕү-саҕы тиэйиигэ Намнааҕы педагогическай колледж тыраахтыра, “Якутлесресурс” тэрилтэ кыамталаах техниката, МАУ АРТ икки техниката үлэлээтэ.
Ону тэҥэ, сэлиэнньэ уопсастыбаннай, дьон тоҕуоруһа мустар сирдэригэр ыраас буолууну өйүүр, көрөр-истэр МАУ АРТ үлэһитэ баар. Бүгүҥҥү күҥҥэ, үгүстэр улуссаҕа бөҕүнэн ыһыахтаналларын, ханна түбэһиэх тамнааттыылларын көннөрүнэн туттунар буолбуттара көстөр. Үлэҕэ бэриниилээх буолуу туругура турдун!
“Күүс-көмө буолбут бука бары тэрилтэлэргэ көхтөөх кыттыыларыгар махтанабыт! Сир хара эрдэҕинэ кэмигэр сэлиэнньэбитин ыраастаатыбыт.
Нам сэлиэнньэтэ мэлдьи ыраас турарыгар олохтоох дьаһалта сылын ахсын биллэрэр “Ыраас чэппиэр” диэн акцияҕа үгүс тэрилтэ өйөөн тахсарыгар дьон-сэргэ махтанар. Нэһилиэнньэ махталын ылыы, олохтоохтортон үтүө тыллары истии – ситиһии, үөрүү, кынаттаныы!” – диир Ленскэй нэһилиэк баһылыгын солбуйааччы Тимофей Охлопков.

СХПК «Эрэл»

Оҕо спорт оскуолата

Оҕо искусствотын оскуолата

Намнааҕы киин балыыһа

«Сахатранснефтегаз»
Харысхан Попов