Кириһиэнньэҕэ айылҕа уута барыта ырааһырар диэн өйдөбүл баар

Нам улууһун таҥараҕа сүрэхтэммиттэрэ, сибэтиэй уунан ыраастанааччылар, хорсун санаалаахтар Дьокуускайга киирэллэр. Намҥа Кириһиэнньэҕэ сөтүөлүүр сир тоҕо суоҕун быһаардахха, сиэрин-туомун толору билбэккэ киһи олоҕор кутталы үөскэтиэххэ сөп диэн санааҕа олоҕурар.

Нам улууһун салалтатыгар өр сылларга үлэлээбит Петр Абрамов бүгүн Дьокуускайга сибэтиэй ууга ыраастанан таҕыста.  Петр Васильевич аан бастакытын 2014 сыллаахха тымныы ууга сөтүөлээн боруобалаабыт.

“Оҕо эрдэхпинэ Хамаҕаттаҕа аҕабыт кэлэ сылдьар күнүгэр эбээм миигин таҥара итэҕэлигэр киллэрбитин өйдүүбүн. Бытархан тымныылар турар күннэригэр санаабар маҥнай ууга киирии долгутуулаах, кутталлаах да этэ. Бастакы санаа – тымныйан ыалдьыам диэн этэ. Дьиктиргиэм иһин, -50, -48 кыраадыска тымныы ууга киирэн бараммын туох да буолбатаҕым.

Тоҕо уонна туох интэриэстээҕий тымныы ууга киирии? Этэллэрин курдук, сыл устата илдьэ сылдьыбыт ыар санаалары, хомолтолору ууга умсан ылан, бэйэҕиттэн ыарахан сүгэһэри түһэрбит тэҥэ чэбдигирэ түһэҕин, сэргэхсийэҕин. Эккин-сииҥҥин уһугуннарбыт киһи буоларыҥ быһыытынан, инники диэки эрэллээхтик хардыылыырга ыраас санаалар киирэллэр.

Ол эрээри дьоҥҥо-сэргэҕэ санаабын соҥнообоппун. Тымныы ууга киирэ үөрэхтээх, таҥараҕа сүрэхтэммит эрэ киһи чэпчэкитик ылынарын сөптөөхтүк өйдүөххэ наада”, – диир Петр Абрамов.

Оттон сибэтиэй уу туһунан эттэххэ, ыраастаммыт ууну ылары хайалара да баалаабат. Суукка устата дьон ойбон алларан бэйэлэригэр уу ылаллар, хаһааналлар. Итиэннэ сыл устата ким хайдах сатыырынан, итэҕэйэринэн ууну туһаналлар эбит. Холобура, Хамаҕатта эдэр ыалын аҕа баһылыга Константин Петров сибэтиэй уу киһи этигэр-сиинигэр күүһү-уоҕу биэрэр диэн ааттыыр. Кини бүгүн бэйэтигэр уу ылан хаһааммыт. Оччотугар итэҕэл күүһэ баар буолан маннык хамсаныылар тахсаллар буоллаҕа…

Харысхан Попов