Россияҕа Дьиэ кэргэн, Саха сиригэр Оҕо саас сылыгар Намнааҕы 4-с №-дээх «Чэчир» уһуйаан иитиллээччилэрэ кэккэ ситиһиилэннилэр. Ол курдук, соторутааҕыта үс иитиллээччитэ Красноярскай куоракка норуоттар икки ардыларынааҕы робототехника чемпионатыгар Саха сирин бүттүүнүн чиэһин көмүскээн, үрдүк ситиһиилэнэн «Дебют» диэн номинацияны ылан кэлбиттэрин туһунан суруйбуппут.
«Деталька – 2024» цифровой технология күрэхтэһиитигэр кыттаннар, Санкт Петербург куоракка ыҥырыллан «Сила инженерии» кыттар чиэстэннилэр. Онон ыам ыйын 10 күнүгэр икки иитиллээччи Юриан Васильев уонна София Петрова төрөппүттэрин, салайааччыларын Юлия Васильевнаны кытары кытта барар буоллулар.
Салайааччыга Юлия Васильевнаҕа Красноярскайга баран кэлии кэнниттэн иккис барыыга үп-харчы өттүтүгэр кэккэ ыарахаттардаах буолбута саарбаҕа суох. Онон билиэт атыылаһарга көмөлөһөр спонсор көрдүүр үлэ саҕаламмыта. Онуоха, «Колми» ХЭТ тэрилтэттэн ыйыппыттарыгар хап-сабар үөрүүнэн көмөлөһөбүт диэн үөртүлэр.
Кэнчээри ыччаппыт сайдарыгар-үүнэригэр кыһаллар, сүрэхтэринэн-быардарынан ыалдьар биир санаалаах дьиэ кэргэҥҥэ Наталья Леонидовна, Николай Иннокентьевич Румянцевтарга 4-с №-дээх «Чэчир» уһуйаан коллектива, төрөппүттэрэ махталларын тиэрдэллэр. Биир дойдулаахтарбыт «КОЛМИ» ХЭТ тэрилтэлэрэ сырдык аартыктара аһылла турдун!
«Эҥсиэли» хаһыат