Хамаҕаттаҕа Комсомол күнүн бэлиэтээн «Түһүлгэ» норуот айымньытын киинэ, «Дьоһун саас» общественнай түмсүү, олохтоох библиотека тэрийиилэринэн «Комсомол — эдэр саас сирдьитэ» нэһилиэк түөлбэлэрин икки ардыларыгар «Толкуйдаа. Оонньоо. Кыай» интеллектуальнай оонньуу буолла. Тэрээһин урукку үгэһинэн “Песня о тревожной молодости” ырыанан саҕаланна, комсомол сылларын сылаас тылларынан ахтыһан, ирэ-хоро кэпсэтэн сэргэхтик ааста.
Нэһилиэк түөрт түөлбэтэ 5-тии киһилээх хамаанда туруоран, форма кэтэн көхтөөх кыттыыны ылла. Арыы Тиит түөлбэ оонньооччулара суруктаах кыһыл футболка кэтэн, Сайдамнар төбөлөрүгэр кыһыл былаат баанан, атыттар комсомольскай формалаах, значоктаах кэлэн оччотооҕу тыыны биэрдилэр. Хардарыта эҕэрдэлэһии түһүмэҕэр Арыы Тиит хамаандата түөлбэ олохтооҕо Екатерина Быканова айбыт хоһоонун аахпыттара сонун буолла. Оонньуу иккис түһүмэҕэр «Бойобуой суол килбиэннээх кэрэһитэ» ыйытыктарга хоруйдааһыны библиотекарь Марина Корякина литератураттан, олохтоох матырыйаалтан таҥан олус чуолкайдык ыытта. Үсүһүнэн, «Ахтыаҕыҥ ол кэрэ күргүөмнээх кэмнэри» урукку кэм лозуннарын салҕааһыны “Түһүлгэ” НАК уус-уран салайаачыта Татьяна Гаврильева ыытта. Салгыы «Эн – комсомол мин дьолум» комсомол ырыаларын таайыы түһүмэҕин Сандаара Оротоо салайда. Түмүккэ ТОК оонньуу кыттааччылара бириэмэҕэ «Комсомол – эдэр сааһым умнуллубат өйдөбүлэ» тиэмэҕэ пазллары хомуйан хартыына таһаардылар. Өй-билии оонньуутугар “Кытыл” түөлбэттэн Клара Петровна Федосеева, “Сайдамтан” Яна Романовна Петрова чаҕылхайдык оонньоотулар, иккиэн, поэт Сабарай Илгэ эппитинии, библиотекарь идэлээх буолан “билии байанайдара” буолалларын көрдөрдүлэр.
Бу күн «Комсомол биһиги сүрэхпитигэр» музей фондатыттан быыстапка тэрилиннэ, нэһилиэк комсомольскай үлэтин көрдөрөр хаартыскалар, альбомнар, куоталаһыы вымпеллара, значоктар онтон да атын экспонаттар көрдөрүүгэ турдулар. Түһүмэхтэр быыстарыгар урукку комсомол ырыалара Степан Иванов баяҥҥа доҕуһуолунан ылланнылар. Ити курдук, бырааһынньыктааҕы киэһэ олохтоох библиотека саалатыгар бэрт бүччүмнүк, истиҥник барда, Оонньуу түмүгүнэн кыттааччылар билбэтэхтэрин билэн, билэллэрин чиҥэтэн: Сайдамнар – 1 м., Кытыллар – 2 м., Арыы Тииттэр – 3 м. буоллулар.
Дьоһун саастаахтар эдэр саастарын эргитэн, интэриэһинэй, көхтөөх тэрээһин буолбутуттан дуоһуйан, тэрийээччилэргэ махталларын тиэртилэр.
Мария Винокурова