«Модун» төрүт оонньуулар киинигэр республика хабылык, хаамыска федерациятын Кубога 12 улуус күүстээх хамаандаларын түмтэ. Барыта 96 спортсмен, олортон — 30 спорт, 4 Сахаада спорт маастардара, 7 спорт маастарыгар кандидата кытынна.
Кубок үөрүүлээх аһыллыытыгар саҥа спорт маастардара, Сахаада спорт маастардара удостоверениеларын туттулар. Хабылык, хаамыска сайдыытыгар кылааттарын, үрдүк көрдөрүүлэрин иһин эҕэрдэ сурук анаатылар, ол иһигэр Намтан Надежда Прокопьева, Урсууна Иванова, Константин Шелковников.
Хамаандалар бары толору састаабынан үс көрүҥҥэ: хабылыкка, 5-тээх, 7-лээх хаамыскаҕа икки күн устата кыайыы туһугар кииристилэр. Бары да эгил тэгил түстүлэр. Оонньууттан оонньууга көрдөрүүлэр тубустулар да, сыыһа-халты туттунуулар да бааллар. Күрэхтэһии тыына түмүгүн диэри өссө сытыырхайан истэ.
Ол курдук, Мэҥэ Хаҥалас хамаандата хаачыстыбанан чорбойон, Кубок хаһаайынынан буолла. Иккис — Дьокуускай, үһүс — Бүлүү. Олунньу саҥатыгар республика чемпионатыгар Манчаары оонньууларыгар путевка ылыы иһин күрэхтэһиэхтэрэ.
Маргарита Охлопкова