Намнааҕы 2-с нүөмэрдээх оскуола спорт саалатыгар бу күннэргэ Нам сэлиэнньэтин тэрилтэлэрэ корнхол чемпионатыгар күрэхтэспиттэрэ. Тэрилтэлэр икки ардыларыгар бу иккис чемпионат ыытылынна.
Ол курдук, корнхол күрэхтэһиитигэр 13 улахан тэрилтэттэн уонна 12 дьоҕус тэрилтэттэн барыта 150 киһилээх хамаандалар бастыыр иһин оонньообуттар. Сыл устата ыытыллар күрэхтэһии быйылгыттан тутула уларыйан тэрилтэлэртэн элбэх киһи күрэхтэһиигэ талаһара көстүбүтүн “Лидер” спорт киин салайааччыта Иван Яковлев бэлиэтиир.
Хайҕабыллааҕа, аан маҥнайгытын маннык күрэхтэһиилэргэ кыттар 9 үлэһиттээх КуБИТ тэрилтэттэн 5 эдэр оонньооччу хамаанда туруоран 2-с миэстэ буолбут. Манна соһуйуу, үөрүү, сөҕүү барыта баар.
Күрэхтэһии финалыгар биэс бастыҥнар киирэн оонньууну салҕаабыттар: НКТЭ, Ленскэй нэһилиэк олохтоох дьаһалтата, “Сулусчаан” уһуйаан, Намнааҕы алын кылаас оскуолата, улуус дьаһалтатын 1-кы хамаандата.
Дьоҕус тэрилтэлэргэ: “Ростелеком”, КуБИТ, Ньургун Тимофеев аатынан өрөспүүбүлүкэтээҕи Олимпийскай эрэл спорт оскуолата, “Теремок” уһуйаан, Лесхоз.
“Бастыҥнарга бэрт эрийсиилээх күрэхтэһии кэнниттэн киирдилэр” диэн ааттаныан ааттанар эбит. холобура, улахаттарга Намнааҕы педколледж 5 бастыҥнарга 1 эрэ очконан хаалбыт… Оттон кыраларга “Кэнчээри” уһуйаан 5 очукуонан хапсыбатах. Тустаахха кыһыылаах.
Улахан тэрилтэлэргэ 127 очукуолаах Ленскэй нэһилиэк олохтоох дьаһалтатын хамаандата эрэллээхтик бастыыр. Иккискэ 119 очукуолаах “Сулусчаан” тахсар. Үһүс 114 очукуолаах НКТЭ буолар. 107 очукуолаах улуус дьаһалтата кэлэр уонна 95 очукуолаах ННОШ.
Бу да сырыыга “Ростелеком” иннин кимиэхэ да биэрбэтэх – 163 очукуо ылан кыайыылааҕынан ааттанар. Онтон 126 очукуолаах КуБИТ кэлэр. РСШОР – 125 очукуоланан үһүс миэстэҕэ тахсар. 109 очукуолаах “Теремок” уонна 93 очукуолаах Лесхоз биэс бастыҥ испииһэк түмүгүн сабаллар.
“Корнхол чемпионатыгар 25 тэрилтэ араас идэлээҕэ кэлэн күрэхтэстэ. 9 киһилээх КуБИТ тэрилтэ 2-с миэстэни ылбыта, кырдьык нэһилиэнньэ, тэрилтэ үлэһиттэрэ спорка сыстыахтарын баҕаралларын туоһулуур. Олус үчүгэй хамсааһын саҕаланан эрэриттэн, биллэн турар, үөрэбит.
Салгыы, дуобат, саахымат, буулдьанан ытыы, сахалыы остуол оонньуулара буолуохтара. Хамаандалар дьарыктарын саҕалаатылар”, – диир Иван Васильевич.
Харысхан Попов