Нам улууһугар 2025 сыл — Кыайыы сыла. Бэлиэ сыл логотибын оҥорууга  тохсунньу  16-26 кк. болдьохтоох, 15 тыһ.солк. суума бириистээх  аһаҕас  уус-уран куонкурус биллэриллибитэ.

Барыта  41 кыттааччы  107  үлэни  ыытта. Кэрэхсэбиллээҕэ, оҕолор  хото  кытыннылар. Ол курдук, улууспут араас нэһилиэктэриттэн 21 оҕо Кыайыы сылын хайдах ылынарын, өйдүүрүн, көрөрүн  уус-ураннык өйуулаан дьүүллүүр сүбэҕэ ыытта. Аҕам, орто саастаах дьонтон 12 үлэ киирдэ, кинилэри сэргэ, 8 устудьуон  кытынна. Куонкуруска Намтан  эрэ  буолбакка,   Тааттаттан, Мирнэйтэн, Сунтаартан  үлэлэр  бааллар. Онон  Нам улууһугар  Кыайыы  сылын  дуораана киэҥ сиринэн тэлэһийэн, уус-уран көрүүлээх, толкуйдаах дьон өйүн-санаатын ымыыта буолан, аҕыйах күҥҥэ болҕомто киинигэр сырытта.

Үлэлэргэ  балаһыанньаҕа  этиллибит  уус-уран таһым, этигэн, хомоҕой көстүү, чэпчэкитик ылынан ойуулуур-дьүһүннүүр ньымалар  өйдөнүмтүөтүк, графическай быһаарыылара  уратытык  туттуллубуттар. Чочуйан, ааҕан-суоттаан  тупсаран оҥоруу  тутуһуллубут.

Дьүүллүүр  сүбэ сэбиэтигэр  8 эксперт  үлэлээтэ: улуус баһылыгын I солбуйааччы А.И. Павлов, улуус баһылыгын экономикаҕа уонна үпкэ-харчыга солбуйааччы  Е.П. Саввинова, улуус мунньаҕын сэбиэтин председателэ  А.И.  Винокуров,  культура управлениетын начальнига С.П. Ядрихинскай, Нам улууһун бэтэрээннэрин сэбиэтин председателэ С.Д. Кобякова, Намнааҕы кииннэммит библиотека ситимин директора М.Р. Софронова, «Эҥсиэли» редакция кыл.редактора Л.А. Ноговицына,  Оҕо искусствотын оскуолатын уруһуй кылааһын преподавателэ К.И. Колодезникова.

Улууска Кыайыы сылыгар «2025 год – Год Победы в Намском улусе» логотип оҥоһуутун уус-уран куонкуруһугар ырытыһыы, санааны атастаһыы, чинчийии түмүгүнэн, З.П. Винокуров аат. оҕо искусствотын оскуолатын Н.Н. Атласов аат. Хатырык филиалын уруһуй кылааһын преподавателэ Петров Григорий Афанасьевич үлэтэ кыайда.

Автор Григорий Афанасьевич логотип ис хоһоонун маннык быһаарар.
Инники күөҥҥэ сырдык халлаан күөҕэ өҥүнэн  2025 сыл суруллубут. Кини күөнүгэр Нам улууһун көрдөрөр, кэпсиир үрүҥ куба ойууламмыт. Кыһыл Армия сүрүн бэлиэтинэн буолбут сулус – логотип хаҥас өттүгэр, дьоһуннаах миэстэҕэ, кытара кыыһар. Бу геральдическай бэлиэ ССРС уонна Варшавскай дуогабар дойдуларын былаахтарыгар, гербэлэригэр сүрүн миэстэни ылбыттара. ССРС кэмигэр кыһыл сулус аан дойду биэс континенын пролетариата биир сомоҕо буолууларын, сулус биэс уһуга планета биэс материгын көрдөрөрө. Кыһыл дьүһүн – пролетарскай революция өҥө. Кини биэс континены биир уопсай сыалга-сорукка түмэн, иилиир-саҕалыыр кыахтааҕа.

Логотип ортотунан  Аҕа дойду Улуу сэриитин кэмигэр Ийэ дойдуларын көмүскээн, эйэлээх олох иһин охсуспут буойуннар хорсун быһыыларынан киэн туттар, кинилэргэ ытыктабыллаах сыһыан бэлиэтэ буолар георгиевскай лиэнтэ долгулдьуйар.

Сырдык халлаан күөҕэ өҥүнэн  суруллубут «Год победы в Намском улусе» аат Нам улууһун гербэтин дьүһүнүн кытта дьүөрэлэһэр.

Бу дьоһун үлэ тохсунньу 29 күнүгэр  дойдуга Аҕа дойдуну көмүскээччи, Сахабыт сиригэр Ийэ дойдуну көмүскээччи, улууспутугар Кыайыы сылларын арыйар үөрүүлээх тэрээһинигэр сүрэхтэннэ.

Лена Ноговицына

 

 

 

 

Читайте дальше