Кыайыылаах түөлбэлэргэ – мөлүйүөннүү суумалаах сертификат

М.К. Аммосов аатынан култуура дыбарыаһыгар Ленскэй нэһилиэк олохтоох дьаһалтата 2024 сыллааҕы түмүгүнэн бастыҥнары чиэстээтэ. Бастыҥ үлэлээх тэрилтэлэр, түмсүүлэр, олохтоохтор сыллааҕы үлэлэрин түмүгэ бу киэһэ сыаналанар.

Ленскэй нэһилиэккэ 2024 сыл ситиһиилээхтик ааста. Тэрилтэлэргэ, түөлбэлэргэ, хас биирдии нэһилиэгим олохтоохторугар бука барыгытыгар барҕа махталбын биллэрэбин”, – диир баһылык Петр Сокольников.

Бүгүҥҥү үөрүүлээх киэһэҕэ намнарга Саха сирин аҕаларын түмсүүтүн председателэ Айхал Габышев ыалдьыттаата. Нам улууһун баһылыга Юрий Слепцов ис сүрэҕиттэн эҕэрдэлээтэ уонна улууспут тэбэр сүрэҕэ Ленскэй нэһилиэккэ үлэ күөстүү оргуйарын бэлиэтээтэ. Нам сэлиэнньэтигэр уопсастыба үлэтэ биллэрдик көстөрүттэн улуус баһылыга Юрий Иннокентьевич үөрэрин биллэрдэ.

 

Киһи бүгүн кырдьык даҕаны үөрэр күнэ үүммүт. I-кы, II-с, III-с бөлөхтөргө кыайыылаахтарынан биллэриллибит “Ипподром”, “Ржевская”, “Базовый” түөлбэлэрэ суолларыгар тупсарыы үлэтин ыыталларыгар Ленскэй нэһилиэк олохтоох дьаһалтата мөлүйүөннүү суумалаах харчы сертификаттарын туттарда.

Ол курдук, нэһилиэнньэ сүрүн күүһэ түөлбэлэргэ олоҕурар. Бу маны ааттыыллар, тугу да тулуппат күүс диэн. Нам сэлиэнньэтин түөлбэлэрэ өссө сайын Үрүҥ Тунах Ыһыахха этэн турардаахтар: баһылык тула хаһааҥҥытааҕар да күүскэ түмүстүбүт!

Олох тупсарыгар, мөлтөх өрүттэр көнөллөрүн тустарыгар туруорсааччы дьон-сэргэ уонна салалта биир кэрдиискэ турабыт. Арай, уратыбыт – баһылык, салайааччы ирдиирин толоробут. Биһиги бары сырдык олох иһин туруулаһабыт. Нам сэлиэнньэтигэр 2025 сыл Патриотизм уонна Кыайыы сыла буоларынан биллэрилиннэ.

2024 сыллаахха анал ааттар кыайыылаахтара:

“Коллектив года” номинация кыайыылааҕынан Георгий Захаров салайааччылаах “Якутлесресурс” тэрилтэ тахсар;

“За совместное сотрудничество” номинация кыайыылааҕынан буолар – Роман Колодезников салайааччылаах Нам улууһун баҕа өттүнэн баһаарынай хамаанда;

“Лучший партнер” номинация кыайыылааҕа – Анатолий Васильев салайааччылаах “Якутскэнерго” тэрилтэ;

“За сотрудничество” номинация кыайыылааҕа – Прокопий Емельянов салайааччылаах “Эрэл” ХЭТ коллектива;

“Лучшее личное подсобное хозяйство” номинация кыайыылаахтара – Дарья, Андрей Нератовтар;

“Наставник года” номинация кыайыылааҕа – “Быйаҥ” ХЭТ дириэктэрэ Руслан Окороков;

“Семья года” номинация кыайыылаахтара – Альбина, Евгений Дьячковскайдар дьиэ кэргэттэрэ;

“Лучшая общественная организация” номинация кыайыылааҕа – Дмитрий Зырянов председателлээх спорт ветераннарын совета;

“Лучший творческий коллектив” номинация кыайыылааҕа – Пелагея Никонова салайааччылаах “Иэйии” ветеран холбоһуга;

“Лучший молодой предприниматель” номинация кыайыылааҕа – Сардаана Свинобоева;

“Ученик года” номинация кыайыылааҕа – улуустааҕы гимназия 11-с кылааһын үөрэнээччитэ Охлопкова Виктория;

“Спортсмен года” номинация кыайыылааҕа – мадьыны Анатолий Гладков;

“Лучшее дошкольное учреждение” номинация кыайыылааҕа – Саргылана Федорова салайааччылаах “Солнышко” уһуйаан;

“Лучшее образовательное учреждение” номинация кыайыылааҕа – Николай Парников дириэктэрдээх Намнааҕы 1-кы нүөмэрдээх орто оскуола;

3-с бөлөххө киирэр түөлбэлэргэ кыайыылааҕынан Варвара Охлопкова салайааччылаах “Базовый” түөлбэ тахсар;

2-с бөлөххө киирэр түөлбэлэргэ кыайыылааҕынан Мария Трапезникова салайааччылаах “Ржевская” түөлбэ тахсар;

1-кы бөлөххө киирэр түөлбэлэргэ кыайыылааҕынан Татьяна Осипова салайааччылаах “Ипподром” түөлбэ ааттана.

Харысхан Попов

Читайте дальше