Хамаҕаттаҕа бүгүн “Тускул” уһуйааҥҥа остуол төрүт оонньууларыгар улууска бастыыр иһин улуустааҕы күрэхтэһии буолбут.
Улуус уһуйаанын иитиллээччилэрин ортотугар буолбут күрэхтэһии түмүгэ оскуола иннинээҕи үөрэх дьиэлэрин спартакиадатын суотугар киириэҕэ. Хабылык, хаамыска көрүҥэр оҕону кыра сааһыттан сыһыарыахха наадатын хаста да бэлиэтээн эппиттэрэ. Нам улууһугар остуол оонньуулара өрө тутулларын хамсааһыныгар барыта 22 хамаанда кыттыыны ылбыта хайҕабыллаах.
Хабылык түһүмэххэ “Улыбка” уһуйаантан Баишев Дыгын 1-кы миэстэ. “Сулусчаан” уһуйаан иитиллээччитэ Спиридонова Сайаара 2-с миэстэҕэ тахсар уонна үһүскэ “Кэрэчээнэ” оҕо саадыттан Васильева Ева тахсар.
Оттон иэрэгэй түһүмэххэ 1-кы миэстэни “Сулусчаантан” Иванов Давид ылар. Иккис миэстэни “Сандаара” уһуйаан оҕото Эверстова Нарыйаана ылар уонна үһүскэ “Солнышко” оҕо саадын иитиллээччитэ Елисеев Эрхан тахсар.
“Эдэр күрэхтэһээччилэрбитин, оонньооччуларбытын кыайыыларынан эҕэрдэлиибит! Инникитин ситиһиини баҕарабыт. Саха оҕото куруутун саха төрүт оонньууларын оонньуу, өрө тута сылдьаргар баҕарабыт!” – диир Намнааҕы оҕо спорт киинин дириэктэрэ Юрий Балаганскай.
Оскуола иннинээҕи оҕолорго төрүт остуол оонньуулара өрө тутулларыгар көхтөөх үлэни ыыталларын иһин Намнааҕы оҕо спорт кииниттэн махтал суруктары туттулар: Захарова Марфа Прокофьевна, Партизаҥҥа “Кустук” уһуйааҥҥа музыка преподавателэ; Уваровская Мария Алексеевна, “Сулусчаан” уһуйааҥҥа физическай иитиигэ инструктор; Ядрихинская Розалия Семеновна, Модутка “Кэнчээри” уһуйаан иитээччитэ.
Харысхан Попов