Москваҕа от ыйын 12-14 күннэригэр бэтэрээннэргэ чэпчэки атлетикаҕа дойду чемпионата буолан ааста. Манна 70-тан тахса регионтан 700 кыттааччы кэлэн күрэхтэспит.
Саха сирин чиэһин 35-тэн уонна 90-н ааспыт 22 спортсмен көмүскээбит. Кинилэр үгүстэрэ Бороҕоннооҕу сайыҥҥы өрөспүүбүлүкэ чемпионатын призердара уонна чемпионнара.
Намтан 52-лээх Василий Готовцев 5000 м, 61-дээх Александр Новгородов 5000 м спорт хаамыытыгар боруонса мэтээли ылары ситистилэр. Бу туһунан «Спорт Якутии» иһитиннэрдэ.
Оттон биһиги ааҕааччыларбыт биир дойдулаахтарбыт ситиһиилэринэн үөрэн санааларын маннык үллэһиннилэр:
Кырыйдым диэн кыбыттарбакка, сааһырдым диэн саллыбакка, эдэрдии эрчимирэн элэстэтэр эр бэрдигэр. Дойдубут таһымнаах күрэҕэр Саха киһитэ сананан көрбөтөх көрүҥэр күрэс былдьаһан, сүҥкэн ситиһиини ситиспит алтыһан ааспыт атаспар Миитэрэй уолугар Өлксөөндүргэ итии истиҥ эҕэрдэбин тиэрдэбин! Өбүгэлэрбит үгэстэрин үйэтитэн, убайдаатар убайдарбыт суолларын солоһон, эдэр көлүөнэ ыччаттарга ыйынньык буолан дьаныһан туран дьарыгырар көрүҥнэригэр өрүүтүн даҕаны баай барыылаах Байанайыҥ бэттэх хайыһан өттүк харалыы сылдьыахтын. Талба тайаныылаах, талаһан туран дьарыгырар көрүҥүн ситиһиигэ сиэттиһэн үөрүүтэ-көтүүтэ үксээтин! Уруй-айхал! Айхал-мичил буолуохтун Кыайыыны түстүүр Өлөксөөндүргэ!».
«Эҥсиэли» хаһыат