Кырдьыгы, үйэлээҕи түстэһэр общественнай корреспонденнарбытын бэлиэтээтибит

Бүгүн, тохсунньу 20 күнүгэр, «Эҥсиэли» редакциябытыгар 2024 сыл түмүгүнэн общественнай корреспонденнарбытын бэлиэтээтибит. Кинилэр көмөлөрө биһиэхэ улахан оруолу ылар.

Тиһигин быспакка нэһилиэктэрин сонунун суруйар буоланнар, хаһыат, сайт, социальнай ситимнэрбит үлэтэ толору, баай ис хоһооннонор. Онон кинилэр идэлээх хаһыатчыттары тэҥэ сыаналанар, убаастанар дьон. Сүрэхтэринэн-быардарынан сөбүлээн, олохторун сорҕото оҥостон күн бүгүнүгэр диэри суруйа туралларыгар махталбытын тиэрдэбит.

 

1988 сылтан «Бастыҥ общественнай корреспондент» диэн аат иҥэриллэр. Кэнники суруйар киһи ахсаана эбиллэн, биирдиилээн номинациялары туттарыы үгэскэ кубулуйда. Бүгүн редакциябыт кылаабынай редактора Лена Ноговицына общественнай корреспонденнарга номинациялары уонна махтал суруктары туттарда. Ол курдук, «Элбэх сонуннаах нэһилиэк» — «Ленскэй нэһилиэк» МТ (баһылык Петр Сокольников), РФ Дьиэ кэргэн сылын бастыҥ сырдатааччы – Мария Винокурова (Хамаҕатта), СӨ Оҕо саас сылын бастыҥ сырдатааччы – Полина Скрябина (Партизан), Темаҕа бэриниилээх буолуу – Маргарита Охлопкова (Хамаҕатта), ЭНСИЭЛИ.РФ сайт бастыҥа – Надежда Сивцева (Хатыҥ Арыы), Бастыҥ общественнай корреспондент – Лена Корякина – Элиэнэ Кэрэ (1 Хомустаах) 2024 сыл бастыҥнарынан буоллулар.

«Эҥсиэли» редакциятын кытары бииргэ үлэлэһэллэрин, көмөлөһөллөрүн иһин махтал суругунан Екатерина Эверстова (Үөдэй), Татьяна Терешкина – Никольская (Никольскай), Валентин Васильев – Эрчим Баһыл (Хатырык), Татьяна Касьянова (Салбаҥ), соц. ситимҥэ анаан айылҕа кэрэ көстүүтүн хаартыскаҕа түһэрэн ыытар Светлана Кутукова, ааспыт сылтан суруйан саҕалаан эрэр И.Е. Винокуров аатынан Хатыҥ Арыы орто оскуолатын 5 кылааһын үөрэнээччитэ Нарыйаана Охлопкова бэлиэтэннилэр. Хаһыакка таһаарыылаахтык, бэриниилээхтик кылаабынай редакторы солбуйааччынан үлэлээбит, убаастыыр, ытыктыыр киһибит Вера Николаевна Рыкунова аатын үйэтитэн, кини дьиэ кэргэнин аатыттан анал биһирэбили биир идэлээхпитигэр, уопуттаах хаһыатчыкка Касьян Олесовка Майя Рыкунова туттарда.

«Эҥсиэли» редакция общественнай корреспондена Надежда Сивцева «Общественный корреспондент-2024» куонкуруска 3-с миэстэни ылла. Куонкурус «Сахабэчээт» ГАУ улуус редакцияларын ортотугар «Тыл күүһэ» диэн идэлээх куонкуруһун номинацията буолар. Надежда Дмитриевна «Эҥсиэли» хаһыат бастыҥ общественнай корреспонденнарыттан биирдэстэрэ. Төрөөбүт Хатыҥ Арыытын сонунун, туруу үлэһит, талааннаах, көхтөөх дьонун, ыччатын, оҕолорун сырдаппыта 20-тэн тахса сыл буолла. Ааспыт сылга биһиги Надеждабыт 101 ыстатыйаны суруйда. Сыл түмүгүнэн «Эҥсиэли.рф сайт бастыҥа» ааты ылары ситистэ. Надежда Дмитриевна үлэтэ өрөспүүбүлүкэ редакцияларын ортотугар сыаналаммытынан истиҥник эҕэрдэлиибит! Киэн туттабыт, астынабыт!

Оттон редакция соц. ситимнэргэ, сайтка үлэтэ «За содержательность», » За актуальность» номинацияларга УЛУС.МЕДИА-ттан кыайыылаах дипломун ылла.

Бүгүн общественнай корреспонденнар мустубучча бэйэлэрин санааларын эттилэр. Ол курдук, «Эҥсиэли» хаһыаппыт төрүттэммитэ 90 сылынан улууспут нэһилиэктэринэн үлэни-хамнаһы сырдатарга десант тэрийиэххэ диэн этии киллэрдилэр. Бу бэлиэ даатанан урукку кэмнэргэ үлэлээбит, билигин үлэлии сылдьар, общественнай корреспонденнарбыт ахтыыларынан кинигэ бэчээттииргэ үлэлэһэбит.

Бэйэ информ.

Читайте дальше