Н.М. Рыкунов аатынан Намнааҕы киин библиотекаҕа байыаннай дьайыы байыастарын чугас дьонугар, дьиэ кэргэттэригэр “Олох сиэдэрэй оһуора” тэрээһин буолла. Бырайыак дьоннор ис санааларын этэллэригэр, сэргэхсийэллэригэр олоҕурар.
Дьон истиҥ сыһыаныгар, уопсастыбаны кытта көрсөн санаа атастаһарга анаммыт бырайыагы олоххо Аҕа дойду буойуннарын дьиэ кэргэттэрин комитетын Нам улууһугар салаатын председателэ, улуустааҕы библиотека салайааччыта Майя Софронова уонна Намнааҕы “Мой Бизнес” киин сэбиэдиссэйэ Марфа Тарабукина киллэрбиттэрэ. Санаттахха, бырайыак былырыын аҕам саастаахтары тэрээһиҥҥэ түмпүтэ.
Бэйэни аралдьытарга, санааҕын ууран арааһы оҥорорго маастар-кылаастар көрдөрүлүннүлэр. Тустаах тэрилтэлэртэн туһалаах сүбэлэр бэрилиннилэр. Ону тэҥэ, “Кэрэ сэбэрэ” бырайыак үлэлээтэ.
Байыаннай дьайыы кыттыылааҕа үлэлээх буолалларыгар үөрэнэн идэ ылалларыгар Намнааҕы дьарыктаах буолуу киинэ күүһүн уурар. Нам улууһуттан идэлэнэн үлэнэн хааччыллыбыттар бааллар. Оттон олорор сирэдэригэр учаастактара суох байыаннай дьайыыга чугас дьоннорун сүтэрбиттэр, сир ылалларыгар сайабылыанньа суруйаллар.
Саха сиригэр байыаннай дьайыы байыастара уопсастыбаннай транспорынан босхо туһанар буоллулар. Нам улууһугар байыаннай дьайыы кыттыылааҕа автобуска туһаныахтаах картатын чугастааҕы “Алмазэргиэнбанк” тэрилтэҕэ паспордаах, СНИЛС-таах тиийэн сайабылыанньа суруйан ылара этиллэр.
Өҥө оҥорор тэрилтэлэргэ дьон кэлиэн, ыйытыан наада. Тустаах көмөҕө наадыйааччыларга иһитиннэрии тохтоло суох барарыгар болҕомто ууруллар. Байыаннай дьайыы кыттыылаахтарыгар улууспут оскуолаларын үөрэнээччилэрэ байыас ис туругун үрдүккэ кынаттыыр суруктары, бэйэлэрэ илиилэринэн оҥорбуттарын ыыталлар. Бу төһөлөөх күндүн буолуой байыаска. «Олох сиэдэрэй оһуора» тэрээһиҥҥэ улуустааҕы гимназия үөрэнээччилэрэ көмөҕө бэйэлэрэ, төрөппүттэрэ тикпит, оҥорбут кээнчэлэри, харысхаллары туттардылар.
Биллэн турар, “Олох сиэдэрэй оһуора” бырайыак кыттыылаахтара тас дьүһүннүүн, ис дууһалыын сырдыыллар. Уопсастыбаны кытта ситимниир, сибээстиир тэрээһиннэргэ, кэпсэтиилэргэ төһө кыалларынан сылдьа сатыахха наада. Бэйэ холобурунан, биир хардыы эрэ оҥоруохха наада. Атах бара үөрэннэҕинэ, айа-тута, уопсай үлэ туһугар туруммуккун бэйэҥ да билбэккэ хаалыаҥ. Соҕотохсуйууга бас бэриммэкэ, дьон ортотугар сылдьыы үчүгэйинэн эрэ саҕыа.
Быйылгы үөрэх дьыла бүтүүтэ, оскуоланы бүтэрээччилэргэ тэрээһин оҥорору былааннанар.
📹Роман Шапошников
Харысхан Попов