«Мой папа — самый лучший» өрөспүүбүлүкэтээҕи соҕотох аҕалар күрэхтэрэ муус устар 13 күнүгэр үһүс төгүлүн буолан ааста. Соҕотох аҕалаах дьиэ кэргэҥҥэ болҕомто уурар, аҕа оруолун үрдэтэр сыаллаах ыытыллар күрэххэ Нам улууһун чиэһин 1 Хомустаах нэһилиэгиттэн Иван Рожин 5 оҕотун кытта көмүскээн, 1 истиэпэннээх дипломунан кыайыылаах үрдүк аатын ыллылар. Күрэх барыта 4 түһүмэҕинэн барда, 8 улуустан дьиэ кэргэннэр кыттыыны ыллылар.
Иван Рожин «СтройУниверсал» тутуу тэрилтэтигэр үлэлээбитэ балйда буолла. 5 оҕону соҕотох иитэн, күннээҕи түбүктэрин бэйэтэ быһаарар. Улахан оҕолоро Альберт, Юлия, Нелли аҕаларыгар көмө буолар туһа дьоно. Кинилэр Дьокуускай куорат 18-с №-дээх оскуолатын үөрэнээччилэрэ. Кыралар Витя уонна Виолетта «Кэскил» оҕо уһуйаанын иитиллээччилэрэ. Рожиннар дьиэ кэргэн оскуолаҕа, уһуйааҥҥа ыытыллар тэрээһиннэргэ, күрэстэргэ мэлдьи көхтөөтүк кытталлар. Оҕолор кыра эрдэхтэриттэн ырыа, хоһоон аргыстаах айылҕа биэрбит талааннарынан араас куонкурустарга кыттан миэстэлэһэллэр.
Иван баҕа санаата — оҕолоро этэҥҥэ үөрэнэн , үлэһит дьон буола улааталлара. «Бэйэбит бас билэр дьиэлэнэрбит буоллар«, — диэн баҕа санаалаахтар. Күрэҕи өрөспүүбүлүкэтээҕи «Аҥаардас аҕалар» түмсүү салайааччыта Иннокентий Спиридонов, Хатас нэһилиэгин «Тускул» култуура киинэ уонна «Алгыстаана» дьахтар сэбиэтэ көҕүлээн тэрийдилэр.
Лена Корякина