Нам улууһугар 2023-24 сс. үөрэх дьыла саҕаланара чугаһыыр. Маҥнайгы кылааска киирээччилэргэ, оскуолаҕа барааччыларга “Үөрэнэ барарга көмөлөс” акция үлэлээбитэ хаһыс да сыла буолла.
Аһымал акция сүрүн сыала: кыаммат араҥа оскуола саастаах оҕото үөрэх дьылыгар бэлэм буоларын ситиһии. Ленскэй нэһилиэк олохтоох дьаһалтатын көҕүлээһининэн, «Помоги собраться в школу» аһымал акция сылын аайы үтүө үгэскэ кулуйан ыытыллар. Быйыл Нам сэлиэнньэтигэр акция атырдьах ыйын 15 күнүттэн саҕаланан балаҕан ыйын 15 күнүгэр диэри ыытыллыаҕа.
Сылын аайы «Помоги собраться в школу» акцияҕа үгүс тэрилтэ, биирдиилээн дьон көхтөөхтүк кыттан кэллэ. Билиҥҥи туругунан, Ленскэй нэһилиэккэ 57 оскуола саастаах оҕо көмөҕө наадыйара биллэр. Аһымалга бастакынан Н.С. Тимофеев аат. Олимпийскай резервэ спортивнай оскуола (профсойуус бэрэсэдээтэлэ А.П. Сильвестров) бэйэтин бачыымын киллэрбитэ. Ол курдук, оскуола боруогун аан маҥнайгытын атыллыыр үөрэнээччилэргэ игирэчээн Айастаан уонна Алгыстаан Харитоновтарга, Афанасьев Айылхаҥҥа «Подарок первокласснику» үөрэх набордары бэлэх ууммута. Ону тэҥэ, Үөдэйтэн «Домик у озера» урбаанньыт Людмила Кокарева элбэх оҕолоох соҕотох ийэ оскуола саастаах 3 оҕотугар быйылгы үөрэх дьылын бэлэм көрсөллөрүгэр канцелярскай тэриллэринэн көмөлөстө.
Бу курдук, Нам сэлиэнньэтин бары тэрилтэлэрин, урбаанньыттарын, олохтоохторун аһымал акцияҕа көхтөөхтүк кыттаргытыгар ыҥырабыт.
Билсэр тел.: 41-352