Нэһилиэкпититтэн «Азия оҕолоро» оонньууга кыттыбыт оҕолорбутун салгыы сырдатабыт.
IV-с оонньууларга Лидия Иванова кыттыыны ылбыта. Лида ону маннык ахтар:
«2008 сыллааха сайын Саха сиригэр аан маҥнайгытын ыытыллыбыт кыргыттарга көҥүл тустуу күрэхтэһиитигэр үрүҥ көмүс мэтээл хааhаайына буолбутум. Маҥнайгы тренерим Аржаков Егор Дмитриевич, Чурапчытааҕы Д.П. Коркин аатынан спорт оскуолатын тренерэ уонна Иннокентий Посельскай, Михаил Скрябин этилэр.
2008 с. «Азия оҕолоро» норуоттар икки ардыларынааҕы спортивнай оонньууга СӨ хамаандатыгар кыттарбар дьарыктаабыт тренердэрим Ким Колодезников, Иван Саркомов буолаллар. Билигин Ким Кимович көҥүл тустууга дьахталларга старшай тренер буолан үлэлии-хамныы сылдьар. Оччолорго «Азия оҕолоро»күрэххэ кыттан тустубуппун олус күүстээх, төhөлөөх элбэх көлөһүн тохтуулаах дьарыгы ааспыппытын санаатахпына олус сөҕөбүн. Мин үксүн 57 киилэҕэ тустар этим, онно Азия оонньууларыгар тустубутум, оччолорго ыйааhыммытыгар да элбэх этибит, араас дойдулартан кэлбит оҕолор да элбэх этилэр, бэйэбит курдук эт саастыылар.
Махтанабын: тренердэрбэр, төрөппүттэрбэр, доҕотторбор, Нам сирин биир дойдулаахтарбар. Элбэх курэхтэhиилэргэ кыттан, үгүс ыарахаттары көрсөн хотторуу да баара, кыайыы да кэлэр этэ. Барытыгар тулуур тулуспута.
«Азия оҕолоро» биhиэхэ буоларыттан уонна биhиги Сахабыт сиригэр төрүттэммититтэн киhи киэн эрэ туттар! Бу оонньуу оҕолорго «Олимпиада» кэриэтэ буолар. Онон сиэттэрэн өссө күүскэ сайдан, кэлэр кэскиллэрбит инники күөҥҥэ, үрдүктэн үрдүккэ тахсаллара олус үчүгэй! Баҕарабын кыттар оҕолорго, спортсменнарга чөл олоҕу тутуhарга, дьоҥҥо-норуокка үрдүк ситиhиини, күүстээх санааны, кытаанах доруобуйаны!
Маргарита Охлопкова