Хамаҕаттаҕа В.П. Артамонов аатынан саха-француз лицей ,,Лингва» лааҕыра Нам улууһун оскуолаларын оҕолоругар сайыҥҥы сынньалаҥнарын тэрийэн бэс ыйын 11 күнүттэн саҕалаан үлэлии турар.
Манна лицей учууталлара 50 оҕону араас дьарыгынан хабаллар.
Физика кистэлэҥнэрин арыйыыга Александр Петров, математика уустук задачаларын суоттуурга Лена Семенова,
,,Мама, я блогер» искусствоҕа Лилия Москвитина, бырайыактыыр үлэҕэ Люция Ушницкая уһуйаллар.
Иитээччилэринэн Лилия Москвитина, Софья Жиркова үлэлииллэр.
Оҕолору минньигэс аһынан повардар Маргарита Кардашевская, Анна Охлопкова күҥҥэ 5-тэ күндүлүүллэр. Доруобуйа, санитарнай турук иһин медсестра Ирина Григорьева дьаныһан үлэлиир.
— ,,Лингва» лааҕыр аан бастакы сезонун 1994 сыллаахха арыйбыта. Оччолорго директор Василий Иннокентьевич Эверстов, француз тылын учуутала Валентина Семеновна Ядрихинская оскуола баазатыгар тэрийбиттэрэ.
Эһиилигэр бу билигин үлэлии турар лааҕыр тутуллан үлэҕэ киирбитэ. Онон бэс ыйын 27 күнүгэр ,,Лингва» үлэлээбитэ 30 сыллаах үбүлүөйүн бэлиэтээри бэлэмнэнэ сылдьабыт, үгүс ыалдьыттары күүтэбит, — диир начальник Алена Аммосова.
Мария Винокурова