Нам улууһун Үөдэйигэр, Билии бырааһынньыгар, биир бэлиэ түгэнинэн РФ үтүөлээх учуутала, РФ уопсай үөрэхтээһинин туйгуна, СӨ Президенын Гранын хаһаайката, “Саха Азия оҕолоро” норуоттар икки ардыларынааҕы фонда стипендиата, “Учууталлар учууталлара” өр сыл устата химия учууталынан олус бэриниилээхтик Үөдэй орто оскуолатыгар үлэлээбит Мотрена Спиридоновна Новгородова сырдык аатын үйэтитэн, химия уонна биология кабинетыгар кини аатын иҥэрдилэр.
Бу тэрээһини көҕүлээччинэн буолар Мотрена Спиридоновна үөрэнээччитэ, оскуола выпускнига, попечитель Ис дьыала министерствотын старшай майора Афанасий Зырянов. Афанасий Иннокентьевич ис сүрэҕиттэн учууталыгар махтанан, сүгүрүйэн туран химия кабинетыгар мемориальнай дуоска оҥотторон аҕалла. Кабинеты үөрүүлээхтик арыйыы кылаас чааһынан түмүктэннэ.
Үөдэйгэ быйылгы 2023-2024 үөрэх дьылыгар 145 үөрэнээччи, ол иһигэр 10 кырачаан оҕо маҥнайгы кылаас боруогун атыллаатылар. Үөрүүлээх, бырааһынньыктааҕы линейкаҕа З.П. Саввин аатынан Үөдэй орто оскуолатын директора Вероника Ранвиловна Барашкова, “Нам улууһа” муниципальнай тэриллии аҕа баһылыгын тыа хаһаайыстыбатын салаатыгар солбуйааччы, нэһилиэк куратора Филипп Васильевич Николаев, “Үөдэй нэһилиэгэ” МТ аҕа баһылыгын солбуйааччы Николай Михайлович Обутов, улуус мунньаҕын депутатыгар кандидат Семен Владимирович Ядреев, оскуола выпускнига, попечитель Ис дьыала министерствотын старшай майора Афанасий Иннокентьевич Зырянов кыттыыны ыллылар.
Филипп Васильевич иһитиннэрбитинэн быйыл улуус үрдүнэн 363 оҕо маҥнайгы кылааска киирбит. Оҕолорго, төрөппүттэргэ, учууталларга саҥа үөрэх дьылыгар үрдүк ситиһиилэри баҕаран туран СӨ “Гражданскай килбиэн” бэлиэ хаһаайкатыгар, Учууталлар учууталларыгар, Үөдэй нэһилиэгин ытык киһитигэр, нуучча тылын уонна литературатын үрдүкү категориялаах учууталыгар үрдүк наҕарааданы “Нам улууһун ытыктабыллаах киһитэ” бочуот знагын туттарда.
Бу күн үгэс быһыытынан маҥнайгы кылааска киирэр оҕолорго сүрүн болҕомто уурулунна. Вероника Ранвиловна долгутуулаах түгэҥҥэ ааспыт үөрэх дьылыгар оскуоланы ситиһиилээхтик бүтэрбит 8 оҕо бары үрдүк уонна орто анал үөрэххэ киирбиттэрин иһитиннэрдэ. Кырачаан оҕолорго билии киэҥ байҕалыгар ситиһиилэри баҕаран туран сахалыы, нууччалыы тылынан суруллубут дневнигы Ил Дархан Айсен Николаев аатыттан туттарда. Өр сыл устата нэһилиэк баһылыгынан үлэлээбит Семен Ядреев эҕэрдэ тыл этэн туран кырачааннарга тус бэйэтин уонна ИП “Эверстов А.И.” аатыттан үөрэх нобуорун бэлэх уунна.
Баһылык солбуйааччыта Николай Обутов “Бойобуой сулууспа бэтэрээннэрин” (ВОИН) общественнай түмсүүтүн аатыттан маҥнайгы кылааска киирбит Руслан Новгородовка сэмэй бэлэҕи туттарда. Руслан аҕата Дмитрий Новгородов анал байыаннай эпэрээссийэ кыттыылааҕа, “Бахмуту ылыы иһин” мэтээл хаһаайына.
Оскуола быйылгы выпускниктара итии-истиҥ тыллардаах эҕэрдэлэрин кырачааннарга анаатылар, сэмэй бэлэхтэрин туттардылар.
Маны тэҥэ саҥа кэлбит эдэр учууталлары оскуола салалтата ситиһиилээх, айымньылаах үлэ үөһүгэр, билии байҕалыгар үктэммиттэринэн үтүөнү баҕаран эҕэрдэлэрин анаатылар. Ол курдук, Попова Надежда Борисовна маҥнайгы кылаас учууталынан, Ефимова Галина Дмитриевна оҕо тэрилтэтин уһуйааччытынан уонна иитии үлэтигэр директор сүбэһитинэн, Петров Виталий Афанасьевич физкультура учууталынан ананан кэллилэр.
Алтан чуорааны лыҥкыначчы тыаһатан 11 кылаас бастыҥ үөрэнээччитэ Сарыал Зырянов уонна кырачаан үөрэнээччи Алиса Ядреева маҥнайгы уруокка ыҥырдылар.
Бэлиэ түгэҥҥэ дойду үрдүнэн педагог уонна уһуйааччы сылынан учуутал күнүгэр киэҥ хабааннаах тэрээһин ыытыллара күүтүллэр.
Екатерина Эверстова, Үөдэй