Маймаҕаҕа Нам улууһун дьаһалтата 2023 с. ыыппыт үлэтин отчуотун видеонан билиһиннэрии кэнниттэн, 2-с бөлөх салайааччыта Юрий Дьяконов олохтоохтор ааспыт сыллааҕы туруорсууларын, ыйытыыларын туолуутугар тохтоото. Ол курдук, Дьокуускай-Нам-Хатырык маршрут оптуобуһа Маймаҕаҕа тиийэригэр СӨ бюджетыттан эбии үп көрүллүүтүгэр уонна Хатырык-Маймаҕа икки ардынааҕы кэрчиккэ СӨ массыына суолларын көрөр-истэр управлениеҕа туруорсан, капитальнай өрөмүөнү – асфалынан бүрүөһүнү 2024 с. былааннарыгар киллэттэрэн, сметатын-бырыйыагын оҥорторууга үлэлэһэллэрин,нэһилиэккэ Интернет, суотабай сибээс үлэтэ тупсарыгар «АрктикТелеком» АО кытта үлэ ыытылларын, Маймаҕа оскуола-саадын прачка-куухунатын тутуу 2024 с. былааҥҥа киирбитин, 2023 с. МТБ хаҥыырыгар иһит, сымнаҕас миэбэл, инвентарь булуутугар үлэ барбытын, культурнай-спортивнай кииҥҥэ спортинструкторы көрүүгэ – норматив быһыытынан нэһилиэнньэ ахсаана эппиэттээбэтинэн үлэһит көрүллүбэтин иһитиннэрдэ.
Кэпсэтиигэ Людмила Лебедева килиэп боппуруоһа сытыытык турарын бэлиэтээн туран, Намҥа көспүт Хатырык бэкээринэтэ үлэлээтэҕинэ бородууксуйатын Маймаҕаҕа аҕалалларын туруоруста. Ньургун Павлов элбэх функциялаах киин (МФЦ) үлэһиттэрэ тоҕо Маймаҕаҕа кэлбэттэрин туоһуласта. Наадалаах дьон Хатырыкка кэлэр күннэригэр онно тиийэн докумуоннарын туттаралларын ахтан туран, инникитин нэһилиэккэ кэлэллэрин ситиһэри баҕарда. Татьяна Колесова оҕо уһуйаанын аттыгар баар эргэ хочуолунайы көтүрүү, суол тимир турбатын хостуур боппуруостарын көтөхтө. Ити курдук о.д.а. олохтоохтор санааларын эттилэр, ыйытыылары биэрэн хоруйдары иһиттилэр.
Нэһилиэк баһылыга Александр Егоров бөһүөлэктэн илин эҥэр нэһилиэктэрин дьоно биэрэккэ барар уонна оҕо, улахан да дьон сынньанар лааҕырдарыгар тиэрдэр суолу саас хаар ууллуута өрөмүөннүүрү туруоруста, Саха сирэ Арассыыйа судаарыстыбатыгар киирбитэ 400 сылын көрсө, Нам улууһугар бастакы остуруок тутуллубутунан үлэни саҕалыырга этии киллэрдэ.
Түмүккэ Юрий Вячеславович этиилэр боротокуолга киирбиттэрин, онон үлэ ыытыллыаҕын эттэ, дьоҕус нэһилиэк таһымыгар элбэх үлэ барарын бэлиэтээтэ,отчуокка кэлэн кыттыбыттарыгар махтанна. Маймаҕалар «Нам улууһа» МТ дьаһалтата 2023 с. ыыппытын үлэтин биһирииллэрин биллэрдилэр. Мунньахха 25 киһи кытынна.
Касьян Олесов-Олук