Саха норуота бүттүүн сүгүрүйэр Бастакы Президеммит Михаил Николаевы кэриэстээн ааһар күммүтүнэн Хамаҕатта оскуолаларыгар сылдьан ааспытын ахтан ааһыахха.
Михаил Ефимович аан бастаан орто оскуолаҕа 1996 сыллаахха тохсунньу 6 күнүгэр кыһыҥҥы каникулга кэмигэр кэлэн педколлективы кытта көрсүбүтэ. Кинини кытта Ил Түмэн депутата Егор Ларионов, улуус баһылыга Александр Ядреев, үөрэх салаатын начальнига Надежда Дьячковская сылдьыспыттара. Ол көрсүһүүгэ инновационнай оскуолалар «Локомотив» буолуохтааххыт диэн барбытын умнубакка саныыбыт.
Саха-француз лицейгэ Михаил Ефимович 2015 сыллаахха сэтинньи 25 күнүгэр кэлбитэ, кинини журналист Иван Ушницкай, улуус баһылыга Александр Атласов, үөрэх управлениетын начальнига Олег Протопопов арыаллаабыттара. Үөрэнээччилэри, коллективы кытта көрсүбүтэ. Үөрэнээччилэр ситиһиилэрин билсибитэ.
2021 сыллаахха Билии күнүгэр лицейгэ тас дойдулары кытта сибээскэ бастакы министр В.П. Артамонов аатын иҥэрэр үөрүүлээх линейкаҕа Москваҕа олорон, быһа эфиринэн тахсан, онлайн-көрсүһүүгэ эҕэрдэлээбитэ.
Михаил Николаев оскуолаҕа кэлэ сылдьыбыт түгэннэрин хаартыскаларынан альбом оҥоһуллубута уонна өйдөбүнньүк стендэҕэ оҕолорго, ыччаттарга туһаайбыт кэс тыла суруллан турар: «Модун санааны үөскэтиэххэ наада! «Мин кыайыаҕым» диэн, «Мин күүстээхпин» диэн, «Мин дьоҕурдаахпын» диэн, «Мин сахабын» диэн. Ол буолар күүстээх итэҕэл! Оннук ыччаттары иитиэх тустаахпыт!»
Мария Винокурова