Олунньу 21 күнүгэр Аппааны сэлиэнньэтигэр «Чороон» норуот айымньытын киинигэр А.Д. Макарова аатынан Дьокуускайдааҕы култуура уонна искусство колледжын 2 куурсун устудьуона Нарыйаана Судинова туруоруутугар Ленинград Блокадатын 80 сылыгар аналлаах «Мин өлүөхпүн баҕарбаппын» театрализованнай көстүү үрдүк таһымнаахтык барда.
Нарыйаана Амма улууһун Сатаҕай нэһилиэгэр Федор Дмитриевич уонна Альбина Валентиновна Судиновтар дьиэ кэргэттэригэр төрдүс оҕонон күн сирин көрбут. Судиновтар үс кыыс, икки уол оҕолоох улахан дьиэ кэргэн буолаллар. Нарыйаана оҕо эрдэҕиттэн ырыа куттаах буолан өссө детсадка сылдьан ыллыырын олус сөбүлүүр эбит. НВК иһинэн ыытыллыбыт «Эн сулускун» бырайыакка ситиһиилээхтик кыттыбыт. Кэлин улаатан баран үҥкүү абылаҥар ылларбыт, ордук аныгылыы үҥкүүнү сөбүлүүр эбит. Улахан кылааска үөрэнэ сылдьан «Чаҕылхайдар» диэн КВН хамаандатын биир бастыҥ кыттааччыта, «МИСС КВН» номинация кыайылааҕа буолар. Сатаҕай орто оскуолатын 2022 сыллаахха ситиһиилээхтик бүтэрэн, сөбүлүүр идэтигэр киирэн үөрэнэ сылдьар.
Быйыл дипломнай үлэтин Ленинград блокадатын 80 сылыгар анаан урут суруллубут ахтыыларга олоҕуран, тылбаастаан эбэн суруйбут ааптарскай үлэтэ буолар. Нарыйаана «Чороон” норуот айымньытын киинигэр тохсунньуга дипломун иннинээҕи практикаҕа кэлэн биир ый устата үлэлээбит.
Театрализованнай көстүүнү «Чороон» НАК иһинэн алтынньы ыйтан тэриллэн үлэлиир «Айар аартык» театральнай куруһуок иитиллээччилэрэ, салайааччы «Чороон» НАК режиссера Горьяна Стрекаловская буолан бииргэ туруорбуттар. Бу куруһуокка уопсайа 28 оҕо дьарыктанар, онтон 22 оҕо театрализованнай көстүүгэ кыттыбыт. Манна сүрүн оруоллары: Таня-Злата Изюмская, Шурик-Толя Сивцев, Юрка-Мирослав Максимов, Маня-Олеся Сивцева, Колька-Айхал Игнатьев, Котька-Антон Макаров, ийэ оруолун Туйара Максимова И.Е. Винокуров аатынан Хатыҥ-Арыы орто оскуолатын алын кылаас учуутала, Софья Константиновна оруолун толордо «Чороон» НАК уус-уран салайааччыта Марианна Винокурова.
Бу көстүүгэ сэрии кэминээҕи блокада оҕолорун күүстээх ыра санаалара, кыайыыга дьулуурдара, дьиэ кэргэҥҥэ, оҕолор икки ардыларыгар сыһыаннара, доҕордоһуулара, хайдах да аччыктаан, хоргуйан сырытталлар, киһилии хаачыстыбаларын түһэн биэрбэтэхтэрэ көстөр. Хас биирдии кыттаачы ол кэминээҕи ыар тыынын сүрэҕэр иҥэрэн, хас биирдии көрөөччүгэ итэҕэтиилээхтик тиэртэ. Маннык оҕо дьоҕурун арыйар тэрээһиннэр өссө да үксүү турдуннар, туоруорааччыларга Нарыйаана Судиноваҕа, Горьяна Стрекаловскаяҕа уонна кырачаан артыыстарга ситиһиилэри баҕарабыт. Ким да умнуллубат! Туох да умнуллубат!
Надежда Сивцева