Бүгүн «Нам улууһа» МТ дьаһалтатын 2024 сыллаах үлэтин отчуоттуу улуус баһылыгын социальнай боппуруостарга солбуйааччы Юрий Дьяконов салайар 4-с бөлөҕө Модут нэһилиэгэр сырытта.
Улуус дьаһалтатын отчуотун 72 киһи кэлэн иһиттэ. 2025 сылга Улуу Кыайыы 80 үбүлүөйдээх сылын бэлиэтиибит. Бүгүн Кыайыы күнүгэр диэри 100 хонук хаалбытын биллэрэн туран, эйэлээх олох туһугар тыыннарын толук уурбут буойуттарбытыгар, уоттаах сэриини туораан дойдуларыгар эргиллэн кэлэн олоҕу чөлүгэр түһэриигэ, тыылга хаалан кыайыы туһугар түүнү-күнүһү аахсыбакка үлэлээбит тыыл бэтэрээннэрин кэриэстээн биир мүнүүтэ сүһүөхпүтүгэр туран чуумпуран ыллыбыт.
Халаан уутун кэмигэр, содулу, саахалы туоратыыга үлэлэспит олохтоохторго «За вклад в предупреждении и ликвидации ЧС» бэлиэни, махтал суруктары туттардылар. Көхтөөх дьиэ кэргэттэр, биирдиилээн дьон уонна саҥа оскуола тутуутугар кылааттарын киллэрсибиттэр махтал суругунан бэлиэтэннилэр.
Отчуот кэнниттэн ааспыт сылга боротокуолга киирбит 35 пууннаах туруорсууттан төһөтө олоххо киирбитин, туох кыайтарбатаҕын Юрий Дьяконов сиһилии билиһиннэрэн уонна быһааран биэрдэ.
Нэһилиэк бюджета кырыымчык буолан ыытыллар үлэлэргэ, программаларга эбии үбүлээһиҥҥэ туруорсуу быһыытынан Модут нэһилиэгин баһылыга Ефим Гоголев үгүһү эттэ. Ол курдук, генбылаан оҥотторуутугар, нэһилиэк көстүүтүн тупсарар, сынньалаҥ сири тэрийэргэ, историяны кэрэһэлиир кинигэ 2 туомун бэчээттэтэргэ, сыбаалканы бэрээдэктээһиҥҥэ, «Модут паарка» тэриллиитигэр, эргэ тутуулары көтүрүүгэ, Сардама сүүрүүк ат кэриэһигэр улуус таһымнаах ат сүүрдүүтүн тэрийэргэ, суол-иис өрөмүөнүгэр о.д.а. хайысхаҕа улуус бюджетыттан көмө көрүллүүтүн туруоруста. Суол-иис оҥоһуллуутугар, саҥа тутууга (стадион) бырайыактыыр-симиэтэлиир докумуон оҥорорго көмөлөһөллөрүгэр эттэ.
CP култууратын үтүөлээх үлэһитэ, СР бэчээтин туйгуна, Россия суруйааччыларын уонна суруналыыстарын сойуустарын чилиэнэ, Эдуард Володин аатынан имперскэй култуура уонна Россия улахан литературнай бириэмийэтин 2-с ист. лауреата, суруйааччы, тылбаасчыт, суруналыыс Мария Егоровна Алексеева аатын култуура бочуот дуоскатыгар киллэриигэ үлэ барыан наадатын эттэ.
Саҥа кулууп дьиэтин туттарыыга докумуон үлэтэ бара турар эбит. Ол курдук, бырайыага култуура министерствотыгар бигэргэммит, аны үп министерствотыгар бигэргэнэрэ хаалбыт. Салгыы экспертиза оҥоһуллуутугар болҕомто ууран күүс-көмө буолалларыгар эттэ.
Биир сүрүн кыһалҕанан быраас амбулаториятын дьиэтэ хаарбах туруктаах. Саҥа амбулаторияны туруорсубуттара ыраатта. Билигин быстах кэмҥэ бырааһа, биэлсэрэ суох олороллор эбит. Балаһыанньаттан тахсар сыалтан улуустааҕы киин балыыһа быһаарыытынан Бөтүҥтэн нэдиэлэҕэ иккитэ кэлэн көрөн бараллар эбит.
Оскуола агро хайысхалаах буолан теплица тутуутун, лааҕыр олбуора терроризмҥа сэрэхтээх буолуу ирдэбилигэр эппиэттээбэтинэн үлэ ыытыллыан наадатыгар тохтоотулар. Саҥа тутулубут оскуолаҕа уунан хааччыйыы уонна убаҕас тобоҕу оботторор техникалара суох буолан кыһалҕа үөскээри турарын иһитиннэрдилэр.
Тыа хаһаайыстыбатын салаатыгар да тохтоон ыллылар. Сайылыктарга, сылгы базаларыгар солооһун оҥорон уот ситимин тардыыта былааҥҥа турар эбит. «Улуу» бааһынай хаһаайыстыба эбиэс сиэмэтин, ыһар техника наадатын, кооператив сайдыытыгар улахан болҕомто ууралларыгар эттилэр.
Улууспут сайдыытыгар үгүс үлэ ыытылларын этэн туран, Модут олохтоохторо улуус дьаһалтатын ааспыт сыллааҕы үлэтин биһирииллэрин биллэрдилэр.
Семен Аргунов