Кулун тутар 15 күнүгэр Модут нэһилиэгэ өй оонньуутун түһүлгэтинэн буолла. Манна Нам улууһун саахымакка түөрт төгүллээх кыайылааҕа Сергей Николаевич Колесов уонна саахыматчыт Евстафий Никифорович Евстафьев сырдык кэриэстэригэр оҕолорун, чугас аймахтарын дьиэ кэргэттэрин өйөбүлүнэн саахымакка Х-с уонна садуобаҕа V-с төгүлүн улуустааҕы аһаҕас күрэҕэ ыытылынна.
Үөрүүлээх аһыллыыга парадтаан киирбит спортсменнары нэһилиэк баһылыга Ефим Гоголев, Дьокуускай куораттан кэлбит С.Н. Колесов кыра кыыһа, промышленнай тэрилтэ былаанныыр отделын салайааччытын солбуйааччы Наталья Колесова, Е.Н. Евстафьев чугас аймаҕа, Нам с. «Көлүкэчээн» оҕо уһуйаанын сэбиэдиссэйэ Марина Макарова, бу күрэхтэһиилэри көҕүлээн тэрийэр спорт бэтэрээнэ Ион Васильев эҕэрдэлээтилэр. Нэһилиэк спортинструктора Николай Сандулин Кыайыы 80 сылынан патриотическай ырыаны бэлэхтээтэ.
Өй оонньуутун икки күрэхтэһиитигэр тэҥинэн барыта 40-тан тахса спортсмен күөн көрүстэ. Саахымакка түмүк маннык таҕыста: кыргыттарга, дьахталларга – 1м.-Сабарайкина Туйара (Нам), 2м.-Эверстова Амелия (Хамаҕатта), 3м.-Осипова Айылаана (Хамаҕатта), уолаттарга, эр дьоҥҥо – 1м.-Васильев Анатолий (Модут), 2м.-Гуляев Иван (Модут), 3м.-Нартахов Роберт (Нам), бэтэрээн эр дьоҥҥо – 1м.-Охотин Анатолий (Нам), 2м.-Попов Алексей (Модут), 3м.-Гуляев Иван (Нам).
Садуобаҕа инники күөҥҥэ таҕыстылар: дьахталларга – 1м.-Григорьева Сардана (Нам), 2м.-Габышева Наталья (Хамаҕатта), 3м.-Алексеева Марфа (Нам), бэтэрээн дьахталларга – 1м.-Розалия Егорова (Нам), 2м.-Ядрихинская Дария (Модут), 3м.-Евсеева Татьяна (Хатыҥ Арыы), эр дьоҥҥо – 1м.-Олесов Касьян (Нам), 2м.-Матвеев Анатолий (Хатыҥ Арыы), 3м.-Иванов Александр (Бөтүҥ), бэтэрээн эр дьоҥҥо — 1м.-Леонтьев Егор (Хамаҕатта), 2м.-Васильев Ион (Модут), 3м.-Сивцев Прокопий (Хамаҕатта).
Үбүлүөйдээх турнирдар кыайыылаахтара, бириистээх миэстэҕэ тиксибит спортсменнар олохтоох дьаһалта туруорбут сыаналаах бириистэринэн, мэтээллэринэн, грамоталарынан наҕараадаланнылар, ону сэргэ С.Н. Колесов оҕолорун дьиэ кэргэттэрин уонна Е.Н. Евстафьев чугас аймахтара Макаровтар дьиэ кэргэттэрэ туруорбут сыаналаах бириистэрин тутан үөрдүлэр.
Нэһилиэккэ 2025 с. Патриотизм сылынан биллэриллибит. Олохтоох дьаһалтаттан саҕалаан, модуттар спортка бэлиэ суолу хаалларбыт биир дойдулаахтарын — 1959 с. К.А. Тимирязев аатынан Москватааҕы тыа хаһаайыстыбатын Академиятын бүтэрэн, инженер-электрик идэлэнэн, профтехүөрэхтээһин эйгэтигэр үлэлээбит, саахымакка Нам оройуонун 4 төгүллээх чөмпүйүөнэ С.Н. Колесовы, Новосибирскайдааҕы уу ресурсун институтун бүтэрбит, 1952-1953 сс. Нам оройуонун велосипедынан 10 км. уонна 30, 50 км. велокросс күрэхтэһиилэрин кыайыылааҕа, призера, Нам оройуонун саахымакка күрэхтэһиилэрин элбэх төгүллээх призера, уһуннук тутуу эйгэтигэр, Нам улууһун архитекторынан үлэлээбит Е.Н. Евстафьевы үтүөтүк саныыллара, киэн тутталлара элбэх бирииһи туруоран спонсордаабыттарыгар көһүннэ. Ол курдук, В.К. Колесов, А.А. Попов, И.С. Охлопков, Н.П. Попова, И.И. Васильев уо.д.а. дьиэ кэргэттэрэ туруорбут сыаналаах бириистэринэн элбэх спортсмен бэлиэтэнэн улаханнык астыннылар, санаалара көтөҕүлүннэ.
Күрэхтэһии сабыллыытыгар сүрүн тэрийээччилэр, спонсордар — Наталья Колесова, Марина Макарова Модут нэһилиэгин баһылыгар Ефим Гоголевка, кыттыбыт спортсменнарга махтаннылар уонна мэлдьи өйүүрүн, көҕүлүүрүн истиҥник ахтан туран, Ион Васильевка сэмэй бэлэхтэрин туттардылар. Инники өттүгэр күрэхтэһии кыттааччыта өссө элбииригэр, чөл олох, спорт өрө тутулларыгар баҕа санааларын тиэртилэр.
Касьян Олесов-Олук