Модут нэһилиэгин баһылыга Ефим Гоголев нэһилиэк билиҥҥи балаһыанньатын билиһиннэрэр.
— Уубут таһымын критическэйэ 715 см этэ, онуоха 910 см дылы тиийбитэ. Билиҥҥи дааннайынан, 162 тиэргэни, ол иһигэр 125 дьиэни ылла, сорох дьиэлэргэ акылааттарыгар киирдэ. Сүөһү-сылгы ахсаанын этэр буоллахха, 2 төбө борооску, 25 сылгы, халаан кэмигэр сылгыны 158 төбө сүттэ диэн аахпыппыт, онтон уубут таһыма түспүтүгэр, күүстээх көрдөөһүн түмүгэр, 70-80 сылгы тыыннаах сылдьара билиннэ, билигин да көрдүү сылдьаллар, бу күннэргэ чуолкайа биллиэҕэ.
Дьон санаата бөҕөх, кытаанах. Көмө кэлэ турар — помпаттан саҕалаан аска-үөлгэ тиийэ. Субуотунньук бөҕө буолар. Күн аайы 80 киһи үлэлиир. Урусхалламмыты көннөрүү, бөх хомуйуу үлэтэ, 2000 тахса куб бөх таһылынна. Халаан кэмигэр даҕаны, билигин даҕаны ЫБМ, полиция, улуус олохтоох дьаһалтата, улуустааҕы тыа хаһаайыстыбата көмөлөһөллөр. КЧС быһаарыытынан, Модукка кураторынан ОДьКХ (ЖКХ) министерствота анаммыта. Министри солбуйааччы Сергей Киров хоно сылдьан үлэлиир. Субуотунньугу күүскэ кинилэр тэрийдилэр. Уу кэлбэтэх курдук оҥорон эрэллэр. Улууспут «Эҥсиэли» хаһыата, өрөспүүбүлүкэтээҕи араадьыйа сырдаттылар-иһитиннэрдилэр.
Штатнай режимҥэ көспүппүт, докумуон үлэтэ элбэх. МФЦ, паспортнайдар, психологтар үлэлииллэр. Үлэ биир ситимнээхтик, тиһиктээхтик барар. Соҕотох буолбатахпыт, түмсүүлээх эбиппит диэн киэн тутта санаатым.
Т. Касьянова